Mae angen barn bobl ifanc arnom! Ydych chi’n adnabod unrhyw un rhwng 11 a 25 oed? Os felly, rhowch wybod iddyn nhw am y cyfle gwych hwn i wneud gwahaniaeth i wasanaethau ieuenctid yn Wrecsam.
Mae ein harolwg Strategaeth Gwaith Ieuenctid ar agor ar hyn o bryd, ac mae angen i bobl ifanc rhwng 11 a 25 oed gymryd rhan.
Welwch chi, rydyn ni’n datblygu Strategaeth Gwaith Ieuenctid newydd i lywio sut rydyn ni’n cefnogi pobl ifanc yn ein hardal dros y pum mlynedd nesaf.
A bydd y strategaeth hon yn nodi sut beth yw gwaith ieuenctid ar hyn o bryd yn lleol, beth mae pobl ifanc yn dweud sydd ei angen arnynt, a sut y byddwn ni a’n partneriaid yn gweithio gyda’n gilydd i ddiwallu’r anghenion hynny.
Mae’r neges yn glir – rhaid i bobl ifanc arwain y ffordd. Felly, os ydych chi’n adnabod unrhyw un rhwng 11 a 25 oed, anogwch nhw i gymryd rhan yn yr arolwg.
Bydd yr wybodaeth a gesglir yn dylanwadu’n uniongyrchol ar sut mae gwaith ieuenctid yn cael ei ddarparu ar hyd a lled Wrecsam — o glybiau ieuenctid a chymorth iechyd meddwl, i chwaraeon, celfyddydau, gweithgareddau digidol, mannau diogel, a chyfleoedd ar gyfer dysgu, gwirfoddoli a datblygiad personol.
Dywedodd yr Aelod Arweiniol Gwasanaethau Ieuenctid Phil Wynn: “Rydyn ni’n gofyn i rieni, arweinwyr grwpiau ieuenctid, ac athrawon ein helpu i ledaenu’r gair, ac annog pobl ifanc i gymryd rhan yn ein harolwg. Os ydych chi’n adnabod unrhyw un rhwng 11 a 25 oed, rhowch wybod iddyn nhw am y cyfle hwn.”
Mae’r arolwg yn fyw hyd at ddydd Sul, 2 Awst.
