Erthygl Gwadd – Cadwch Gymru’n Daclus
Mae Cadwch Gymru’n Daclus yn ôl gyda’r ymgyrch sbwriel dros yr haf sy’n cael ei gefnogi gan Lywodraeth Cymru, ‘Creu Straeon, Nid Sbwriel’ wrth i ddata newydd ddatgelu bod swm brawychus o sbwriel yn cael ei adael ar ôl ar draethau ac mewn parciau.
Canfu arolygon a gynhaliwyd gan Cadwch Gymru’n Daclus, o’r ardaloedd a arolygwyd, bod gan 79.4% ohonynt feslysion a’u deunydd lapio, gyda sbwriel diodydd yn ail agos ar 72.6%.
Gyda’r haf ar ei anterth a mwy o bobl allan yn mwynhau dros yr wythnosau nesaf, gofynnir i’r cyhoedd ymddwyn yn gyfrifol a mynd â’u sbwriel gartref gyda nhw.
Yn Wrecsam, mae clirio ardaloedd fel traethau a pharciau yn costio tua £1.5m bob haf.
Dywedodd y Cynghorydd David A Bithell, Aelod Arweiniol dros yr Amgylchedd, “Mae gan Wrecsam lawer o barciau a mannau gwyrdd gwych i bobl eu mwynhau, yn enwedig yn ystod misoedd yr haf.
Gofynnwn i bawb chwarae eu rhan trwy fynd â’u sbwriel adref a’i waredu’n gyfrifol, gan helpu i gadw’r lleoedd hyn yn lân, yn ddiogel ac yn groesawgar i eraill.”
Dywedodd Owen Derbyshire, Prif Weithredwr Cadwch Gymru’n Daclus:
“Mae’r ffigurau hyn unwaith eto yn siomedig iawn. Mae Cymru wedi cael ei bendithio gan rai o’r traethau, parciau a mannau gwyrdd mwyaf hardd yn y byd i gyd, ac mae gennym i gyd gyfrifoldeb i ofalu amdanynt.”
Aeth ymlaen i ddweud.
“Wrth i fwy o bobl fynd allan i’r awyr agored i fwynhau y tywydd cynnes, mae’n hanfodol ein bod yn gadael y mannau hyn fel y cawsom nhw. Mae modd osgoi taflu sbwriel yn llwyr. Os yw bin yn llawn, ewch â’ch sbwriel gartref a’i waredu’n gyfrifol. Mae’n weithred syml, ond yn un sy’n gwneud gwahaniaeth mawr.”
I ddarganfod mwy am ymgyrch sbwriel yr haf Cadwch Gymru’n Daclus, ewch I wefan cadwch gymru’n daclus.
