Bob blwyddyn, mae pob Maer newydd yn enwebu elusennau i godi arian ar eu cyfer trwy gydol eu tymor yn y swydd. Maen nhw’n gwneud hyn trwy nifer o ddigwyddiadau codi arian yn ystod eu blwyddyn faerol.
Mae ein Maer presennol, y Cynghorydd Jeremy Kent, wedi dewis Andy’s Man Club a We Mind The Gap fel ei elusennau.
Yn ogystal â’i elusennau dewisol, mae’r Maer yn benderfynol o wneud rhywbeth bach yn ychwanegol. Mae am geisio hyfforddi 1000 o bobl mewn cymorth cyntaf rhwng ei ddyletswyddau Maerol.
Yn ogystal â’i rôl faerol a’i ymrwymiadau gwaith y tu allan i’r Cyngor, mae’r Cynghorydd Kent yn wirfoddolwr gyda’r Cadetiaid Awyr. Dros y blynyddoedd yn ei rôl wirfoddol, mae wedi hyfforddi cadetiaid mewn amrywiaeth eang o sgiliau, gan gynnwys cymorth cyntaf.
Mae’n credu ei bod hi’n bwysig bod gan bawb rywfaint o ddealltwriaeth sylfaenol o gymorth cyntaf gan nad ydych chi byth yn gwybod pryd y gall yr angen i ddefnyddio’r sgiliau hyn godi.
Gan ystyried hyn, roedd y Cynghorydd Kent yn meddwl y gallai ymgorffori hyn yn ei ddyletswyddau maerol a’i nod yw mynd allan i gymuned Wrecsam a darparu hyfforddiant cymorth cyntaf i drigolion.
O ysgolion i grwpiau cymunedol, mae croeso i bawb gymryd rhan yn ei sesiynau hyfforddi, ac mae’n eu cyflwyno am ddim.
Mae’r Maer eisoes wedi gwneud cynnydd mawr gyda’i ymdrechion wrth iddo ddechrau ei sesiynau cymorth cyntaf gyda disgyblion Ysgol Sant Paul. Mae llawer mwy o sesiynau eisoes wedi eu trefnu gydag amrywiaeth o grwpiau cymunedol yn y ddinas a’r cyffiniau.
Wrth siarad am ei uchelgeisiau ar gyfer y prosiect, dywedodd y Maer: “Mae cymorth cyntaf yn sgil hanfodol rydw i’n credu y dylen ni i gyd gael rhywfaint o ddealltwriaeth ohono, hyd yn oed ar lefel sylfaenol. Dydyn ni ddim yn gwybod pryd y bydd angen cymorth meddygol ar rywun ac rydw i’n credu ei bod hi’n bwysig bod yn barod ar gyfer y sefyllfaoedd annisgwyl hynny.
“Rydw i’n gobeithio cyflawni fy nod o hyfforddi 1000 o bobl yn ein cymuned a’u paratoi i allu camu i’r adwy a chynnig gofal a chymorth i aelod o’r teulu, ffrind, dieithryn, unrhyw un sydd mewn angen.
“Rydw i’n annog pawb i ddod draw i ymuno ag un o’r nifer o sesiynau rydw i wedi’u cynllunio neu i gysylltu os ydyn nhw eisiau trefnu sesiwn gyda mi. Mae croeso i bawb ac edrychaf ymlaen yn fawr at, gobeithio, wneud gwahaniaeth cadarnhaol yn ein cymuned gyda’n gilydd”.
