Mae camau gweithredu i fynd i’r afael â thipio anghyfreithlon yn cael eu cryfhau trwy ddefnyddio camerâu gwyliadwriaeth ar draws y fwrdeistref sirol.
Mae offer camera ychwanegol wedi’i sicrhau yn ddiweddar, gan alluogi swyddogion i ehangu monitro mewn lleoliadau lle mae tipio anghyfreithlon wedi’i nodi fel pryder.
Mae’r rhwydwaith camerâu presennol yn cynnwys naw camera, gan gynnwys tri chamera sy’n cael eu pweru gan y prif gyflenwad a chwe chamera sy’n cael eu gweithredu gan fatri. Yn ddiweddar, sicrhawyd pedwar o’r camerâu sy’n cael eu gweithredu gan fatri trwy fenter Gweithredu Tipio Anghyfreithlon Cymru, gan gynyddu’r offer sydd ar gael i gefnogi camau i fynd i’r afael â thipio anghyfreithlon.
Mae safleoedd posibl yn cael eu hasesu trwy ddefnyddio digwyddiadau a adroddwyd, data amgylcheddol, profiad swyddogion a gwybodaeth leol. Mae gwaith paratoi bellach ar y gweill, gan gynnwys gwiriadau technegol, mesurau diogelwch, diogelu data ac addasrwydd safleoedd.
Bydd y camerâu yn cael eu cyflwyno’n raddol unwaith y bydd y gwiriadau a’r trefniadau angenrheidiol wedi’u cwblhau.
Dywedodd y Cynghorydd David A Bithell, Aelod Arweiniol dros yr Amgylchedd, “Mae tipio anghyfreithlon yn annerbyniol ac yn cael effaith niweidiol ar ein cymunedau, yr amgylchedd ac adnoddau cyhoeddus.”
“Bydd ehangu’r defnydd o gamerâu yn rhoi offer ychwanegol i’n swyddogion ymchwilio i ddigwyddiadau, nodi’r rhai sy’n gyfrifol a chefnogi camau gorfodi.”
“Mae preswylwyr yn gallu bod yn sicr bod camau rhagweithiol a thargedig yn cael eu cymryd ar draws y fwrdeistref sirol, a dylai unrhyw un sy’n ystyried gollwng gwastraff yn anghyfreithlon ddeall y gallen nhw gael eu dal a’u dal i gyfrif.”
Bydd yr holl offer yn cael ei ddefnyddio yn unol â gofynion cyfreithiol a diogelu data perthnasol, gydag arwyddion priodol wedi’u gosod lle bo angen.
Mae preswylwyr yn gallu cefnogi’r gwaith hwn trwy barhau i roi gwybod am dipio anghyfreithlon a darparu cymaint o wybodaeth ddefnyddiol â phosibl trwy’r Adran ‘Tipio anghyfreithlon’ ar wefan Cyngor Bwrdeistref Sirol Wrecsam.
