Gan barhau â’n partneriaeth â Chyngor Sir y Fflint, rydym yn ymchwilio i’r posibilrwydd o greu Canolfan Asesu Plant Arbenigol flaenllaw i ddiwallu anghenion gofal a chymorth plant a phobl ifanc yn yr ardal.
Mae’r prosiect cwmpasu yn cael ei ariannu’n gyfan gwbl gan Gronfa Tai â Gofal (CTG) Llywodraeth Cymru, ac rydyn ni’n gweithio’n agos gyda Sir y Fflint ar ganolfan a allai ddarparu llawer iawn o wasanaethau mewn un safle, gan roi gofal a chymorth ychwanegol i deuluoedd.
Cyfleoedd enfawr i blant a theuluoedd
Gallai plant a’u teuluoedd o bob rhan o Wrecsam a Sir y Fflint elwa o’r prosiect arloesol, gyda’r manteision posibl yn cynnwys:
- Cynyddu ein gallu i gynnig y math iawn o ofal a chymorth i blant a phobl ifanc ag anghenion cymhleth, yn agosach at eu cartref
- Cynnig mwy o wasanaethau gofal preswyl i blant ag anghenion cymhleth
- Bod â gwasanaeth cyflwyno model hyblyg, fyddai’n fwy ymatebol i anghenion unigol plant a phobl ifanc
- Darparu cymorth nid-er-elw
- Lleihau’r defnydd o Leoliadau y Tu Allan i’r Sir y tu allan i’r sir ar gyfer plant a phobl ifanc
“Potensial anhygoel”
Dywedodd y Cyng. Robert Walsh, Aelod Arweiniol Gwasanaethau Plant a Theuluoedd: “Mae hwn yn brosiect sydd â photensial anhygoel. Mae’n gyfle i greu’r unig ganolfan asesu o’i math yn y rhanbarth, gan gynnig asesiadau therapiwtig ac addysgol ochr yn ochr â chymorth preswyl tymor byr. Byddai hyn yn ein helpu i fynd i’r afael ag anghenion a chymhlethdodau plant yn eu cymuned eu hunain.”
Dywedodd y Cynghorydd Christine Jones, Aelod Cabinet Cyngor Sir y Fflint dros Wasanaethau Cymdeithasol a Lles: “Mae hwn yn gyfle cyffrous i archwilio ffordd newydd o gefnogi plant a phobl ifanc ag anghenion cymhleth ar draws Sir y Fflint a Wrecsam. Bydd dod â gwasanaethau allweddol at ei gilydd yn helpu i sicrhau bod plant yn derbyn y gofal, y gefnogaeth a’r asesiadau sydd eu hangen arnynt yn nes at adref.”
