Darganfod mwy am gynigion ar gyfer Stryt Fawr Wrecsam

Mae gwahoddiad i breswylwyr lleol i ddysgu mwy am y cynigion cyffrous ar gyfer canol dinas Wrecsam.

Mae cyfres o sesiynau galw heibio i’r cyhoedd yn cael eu cynnal dros y tair wythnos nesaf lle gall pobl ddysgu am y cynlluniau i adfywio’r Stryt Fawr – gan wella ei photensial i gynnal digwyddiadau, marchnadoedd stryd a diwylliant caffis, gan ategu ei adeiladau hanesyddol rhestredig yn yr ardal.

Mae’r cyngor hefyd yn edrych i gyflwyno isadeiledd gwyrdd gyda llwyni a choed, a dodrefn stryd newydd – gan wella’r ardal i bobl leol, busnesau ac ymwelwyr.

Meddai’r Cynghorydd Nigel Williams, Aelod Arweiniol Economi Cyngor Wrecsam: “Rydym yn awyddus iawn i rannu’r cynlluniau hyn gyda chymaint o bobl ag sy’n bosib felly dewch i’n gweld.

“Rydym yma i ateb eich cwestiynau ac i wrando ar unrhyw bryderon neu syniadau sydd gennych, a bydd eich safbwyntiau yn ein helpu wrth i ni symud y prosiect ymlaen.

“Fel dinas fwyaf newydd Cymru mae’n bwysig ein bod yn parhau i fuddsoddi a gwella canol y ddinas fel ei fod yn cynnig y profiad gorau posib a bydd rhoi bywyd newydd i’r Stryt Fawr yn gam ymlaen pwysig iawn.”

Mae yna 16 o sesiynau galw heibio, ac mi fydd swyddogion y cyngor ar gael i fynd drwy’r manylion, i ateb cwestiynau ac i roi adborth ar unrhyw bryderon neu sylwadau sydd gennych.