Wrth i Barc Gwledig Tŷ Mawr ddod yn safle Meysydd Chwarae Cymru eleni, bydd pob un o’n Parciau Gwledig wedi ennill y statws, sy’n golygu na chânt byth eu gwerthu na’u defnyddio ar gyfer adeiladu, ac felly gall pobl Wrecsam eu defnyddio a’u mwynhau am byth a bydd mannau gwyrdd ar gael ar gyfer cenedlaethau’r dyfodol.
I ddathlu’r llwyddiant hwn rydym yn cynnal digwyddiad yn Nhŷ Mawr ddydd Sadwrn 23 Medi o hanner dydd ymlaen, gan gynnwys gwasg afalau ag Ymddiriedolaeth Treftadaeth Brymbo lle bydd cyfle i wneud eich sudd afal ffres eich hun, yn ogystal â difyrrwch mewn Dosbarth Coetir yn dysgu am y rhyfeddodau yn y perthi, chwilota am bethau i’w bwyta, coginio a’u defnyddio er lles ein hiechyd. Wedi hynny bydd yno goginio o amgylch y tân gyda Lea o’r Dosbarth Coetir, a fydd yn gwneud Elicsir Einir Ysgaw a Jam Mwyar Duon heb unrhyw siwgr, yn llawn blas a maeth!
Mae Cyhydnos yr Hydref ar 23 Medi hefyd, yn ogystal â dechrau ‘Tymor Hel Hadau’ y Cyngor Coed. Byddwn yn rhannu ein gwybodaeth am yr holl wahanol hadau coed y gellir dod o hyd iddynt ym Mharc Gwledig Tŷ Mawr, a bydd cyfle i bobl greu celf naturiol i fynd adref â nhw. Beth am alw draw a gweld faint ydych chi’n ei wybod?
Byddwn hefyd yn dathlu ein henwebiad ar gyfer Coeden y Flwyddyn ac yn annog pobl i bleidleisio dros y goeden drwy’r ddolen hon: Tree of the Year – Woodland Trust. Os credwch chi bod y goeden hon yn haeddu ennill Coeden y Flwyddyn gydol y Deyrnas Gyfunol, pleidleisiwch rŵan! Mae Cyngor Bwrdeistref Sirol Wrecsam yn gweithio mewn partneriaeth â Coed Cadw i warchod coed a choedwigoedd gydol y sir drwy ein prosiect Cysylltiadau Coetir sydd wedi’i ariannu drwy’r Gronfa Argyfwng Coed. Dewch i ddysgu mwy am bwysigrwydd coed a choedwigoedd i fywyd gwyllt a phobl, a dweud pam rydych chi’n meddwl bod Coed yn Bwysig.
Meddai Helen Griffiths, Prif Weithredwr Meysydd Chwarae Cymru: “Mae parciau’n gwneud lles i bobl. Maent yn llesol i’n hiechyd corfforol a meddyliol, maent yn dod â chymunedau ynghyd ac yn creu cysylltiad rhyngom ni a’r byd naturiol o’n cwmpas ni.
“Felly rydym i gyd yn gyfrifol am helpu i warchod ein mannau gwyrdd am byth, ac rwy’n falch bod Cyngor Dinas Wrecsam yn dangos hynny drwy warchod eu deg o barciau gwledig ar ben y nifer o barciau a mannau gwyrdd eraill y maent wedi’u diogelu â ni o’r blaen.”
I gael mwy o wybodaeth am gefnogi Meysydd Chwarae Cymru – yr unig elusen yn y Deyrnas Gyfunol sy’n gwarchod parciau a mannau gwyrdd, ewch i’r wefan Work with us | Fields in Trust.
