Dyma atgoffa trigolion nad oes esgus am dipio anghyfreithlon, yn dilyn pryderon am wastraff yn cael ei ollwng mewn mannau cyhoeddus ar draws y fwrdeistref sirol.
Rhwng Ebrill 2025 a Mawrth 2026, mae Cyngor Wrecsam wedi derbyn 1,689 o adroddiadau am dipio anghyfreithlon.
Mae tipio anghyfreithlon yn erbyn y gyfraith, yn difrodi cymunedau lleol, yn creu costau glanhau diangen, a gall gael effaith ddifrifol ar yr amgylchedd.
Mae trigolion yn cael eu hannog i waredu gwastraff yn gyfrifol trwy ddefnyddio canolfannau ailgylchu swyddogol, gwasanaethau casglu gwastraff swmpus neu gludwyr gwastraff trwyddedig. Gallwch ddod o hyd i gludwr gwastraff trwyddedig ar wefan Cyfoeth Naturiol Cymru.
Daw’r neges atgoffa ar ôl i bryderon gael eu codi am eitemau o’r cartref yn cael eu gollwng mewn mannau cyhoeddus, gan gynnwys eitemau gwastraff swmpus fel eitemau trydanol ac offer gardd.
Gallai unrhyw un sy’n cael ei ddal yn tipio’n anghyfreithlon yn Wrecsam gael hysbysiad cosb benodedig o £400, tra gallai deiliaid tai sy’n methu â bodloni dyletswydd gofal wrth waredu gwastraff dderbyn hysbysiad cosb benodedig o £300, neu ddirwy ddiderfyn os cânt eu herlyn.
Gellir mynd ag achosion mwy difrifol i’r llys, lle gallai troseddwyr wynebu dirwy o hyd at £50,000 neu ddedfryd o 12 mis o garchar.
Dywedodd y Cynghorydd David A Bithell, Aelod Arweiniol dros Wasanaethau’r Amgylchedd, “Does dim esgus o gwbl am dipio anghyfreithlon yn Wrecsam, yn enwedig pan fydd gan drigolion fynediad at ganolfannau ailgylchu a ffyrdd priodol o waredu eu gwastraff.”
“Mae gollwng sbwriel mewn mannau cyhoeddus yn hunanol, anghyfrifol ac yn gwbl annerbyniol. Mae’n difetha ein cymunedau, yn costio arian i’w glirio, ac yn annheg ar y trigolion sy’n ymfalchïo yn lle maen nhw’n byw.”
“Rydyn ni eisiau anfon neges glir na fydd tipio anghyfreithlon yn cael ei oddef. Os cewch chi eich dal, gallech chi wynebu hysbysiad cosb benodedig, erlyniad, dirwy sylweddol neu hyd yn oed garchar yn yr achosion mwyaf difrifol.”
“Os oes gennych chi wastraff i gael gwared arno, defnyddiwch y canolfannau ailgylchu, trefnwch gasgliad a gwnewch yn siŵr eich bod chi’n defnyddio cludwr gwastraff trwyddedig; does dim esgus am ei ollwng.”
Canolfannau ailgylchu gwastraff y cartref Wrecsam yw:
Stad Ddiwydiannol Wrecsam (Lôn y Bryn)
Lôn y Bryn
Stad Ddiwydiannol Wrecsam
LL13 9UT
Brymbo
Y Lodge
Brymbo
LL11 5NR
Plas Madoc
Banc Wynnstay
Plas Madoc
LL14 3ES
Mae tudalen we canolfannau ailgylchu gwastraff y cartref ar wefan Cyngor Wrecsam hefyd yn rhestru’r mathau o eitemau y gellir eu cymryd i bob safle. Ni dderbynnir gwastraff masnachol na diwydiannol yng nghanolfannau ailgylchu gwastraff y cartref Wrecsam.
Gellir rhoi gwybod am dipio anghyfreithlon i Gyngor Wrecsam hefyd drwy’r ffurflen ‘Rhoi gwybod am dipio anghyfreithlon’ ar-lein.
Mae mynd i’r afael â thipio anghyfreithlon yn parhau i fod yn flaenoriaeth, a dylai’r rhai sy’n gollwng gwastraff yn anghyfreithlon fod yn ymwybodol y gellir cymryd camau gorfodi ac y gwneir hynny os oes rhaid.
