Ddydd Mawrth 2 Gorffennaf cafodd Rock the Park (Wrecsam) Cyf ddirwy o £20,000 am greu gormod o sŵn yn yr ŵyl a gynhaliwyd ym mis Awst 2023. Gyda chostau a gordal i ddioddefwyr ar ben hynny, bydd yn rhaid i’r cwmni dalu cyfanswm o £16,381. Nid oedd neb o’r cwmni’n bresennol yn y llys i bledio’u hachos a phasiwyd yr euogfarn yn eu habsenoldeb.
Dechreuwyd ymchwiliad yn sgil y digwyddiad a gynhaliwyd dros benwythnos yn 2023, lle bu Swyddogion Iechyd yr Amgylchedd y Cyngor yn cofnodi lefelau’r sŵn, a oedd ddwywaith cymaint â’r terfyn a bennwyd yn y drwydded ar gyfer y band tecno o’r Almaen, Scooter, yr artistiaid olaf ar y llwyfan ar y nos Wener.
Pwyllgor trwyddedu’r Cyngor a bennodd y terfynau sŵn wrthi roi trwydded i’r digwyddiad, ar sail pryderon ynglŷn â thrigolion y tai gerllaw a gafodd eu haflonyddu gan ddigwyddiadau yn y gorffennol, ac fe gytunodd y trefnwyr fodloni’r amodau er mwyn cael trwydded.
Meddai’r Cynghorydd Hugh Jones, Aelod Arweiniol Gwarchod y Cyhoedd a Chynllunio, “Mae’n siomedig na fedrodd trefnwyr y digwyddiad osgoi peri aflonyddwch i drigolion lleol ar y nos Wener gyda cherddoriaeth oedd yn rhy swnllyd, er gwaethaf yr amodau penodol a osododd Pwyllgor Trwyddedu’r Cyngor. Mae’r amodau hynny’n rhai pwrpasol sydd wedi’u gosod am resymau da, ac yn bennaf i warchod y bobl hynny sy’n byw’n agos at y digwyddiad.
“Mae’n braf gwybod fod hwn yn achos prin a bod y rhan fwyaf o drefnwyr yn cymryd eu cyfrifoldebau o ddifrif ac yn cynnal eu digwyddiadau mewn ffordd broffesiynol, heb achosi niwsans i neb. Mae’r Cyngor yn cefnogi digwyddiadau sy’n dod â budd i’r gymuned ac yn helpu i hyrwyddo Wrecsam fel lle gwych i fwynhau amrywiaeth fawr o atyniadau diwylliannol. Rydw i’n ffyddiog bod yr achos prin yma’n dangos nad yw’r Cyngor yn petruso cyn gweithredu pan mae angen.”
O bryd i’w gilydd, nid yw digwyddiadau fel hyn yn bodloni disgwyliadau’r cwsmeriaid ac weithiau cânt eu canslo neu’u gohirio heb fod y bobl sydd wedi prynu tocynnau’n gwybod eu hawliau.
Os ydych chi mewn sefyllfa felly, ffoniwch Wasanaethau Cwsmeriaid Cyngor ar Bopeth i gael cyngor yn rhad ac am ddim. Ffoniwch 0808 223 1144 (neu 0808 223 1133 yn Saesneg) neu ewch i’r wefan.
Derbyniwch y newyddion a’r wybodaeth ddiweddaraf yn syth i’ch mewnflwch.
Efallai yr hoffech hefyd ddarllen Cynhelir yr Ŵyl ‘Spirit’ Ryngwladol yn Sgwâr y Frenhines, ddydd Sadwrn 13 Gorffennaf
