Fel rhan o’r gwaith parhaus i adnewyddu, adfer a diweddaru’r Hen Lyfrgell, bydd craen yn cael ei leoli ar Sgwâr y Frenhines ddydd Mawrth er mwyn codi goleuadau to i’w lle.
Disgwylir i’r gwaith i drawsnewid yr Hen Lyfrgell gostio ychydig dros £4 miliwn sy’n fuddsoddiad sylweddol arall yng nghanol dinas Wrecsam gyda’r cyllid ar gyfer y prosiect yn dod o Gronfa Ffyniant Gyffredin y DU, ynghyd â chronfa Trawsnewid Trefi Llywodraeth Cymru.
Bydd gan yr adeilad rhestredig Gradd II rôl newydd yng nghanol y ddinas fel pwerdy diwydiannau creadigol, gan ddarparu gofod rhentu hyblyg hirdymor a byrdymor i sefydliadau ac unigolion yn y sector a fydd yn rhoi hwb i uchelgeisiau creadigol a diwylliannol Wrecsam.
Bydd yr eiddo’n cynnwys dau lawr o ofod rhent y gellir ei ddefnyddio fel gweithdai, swyddfeydd a mannau arddangos. Bydd yr adeilad hefyd yn cynnwys caffi gydag ardaloedd eistedd awyr agored.
- Cofrestru -
Bydd yr Hyb Creadigol yn hwyluso cyfleoedd newydd ar gyfer carfan gynyddol o weithwyr creadigol proffesiynol ar draws Gogledd Cymru a bydd yn darparu cyfleoedd ar gyfer cydweithio rhwng y sector, sefydliadau addysgol lleol a busnesau yn ogystal ag arddangos y celfyddydau a thechnoleg.
Mae’r gwaith sydd wedi’i gwblhau ac sy’n mynd rhagddo yn y llyfrgell yn cynnwys:
Gwaith atgyweirio i’r clochdy, ailosod pren a llechi ar y to, gwaith plwm ar feini copa’r drychiadau, gwaith maen fel atgyweirio silffoedd – yn ogystal ag adnewyddu ffenestri metel presennol.
Mae gwaith daear ac adeiladwaith dur ar yr estyniad gwydrog yn parhau gyda’r to gwydr a’r waliau wedi’u cynllunio i’w darparu a’u gosod o 2 Mehefin.
Yn fewnol, mae’r gwaith stripio, plastro ac atgyweirio yn mynd rhagddo fel rhan o’r rhaglen a bydd lifft yn cael ei osod yn ystod yr wythnos nesaf.
Dywedodd Arweinydd Cyngor Wrecsam a’r Aelod Arweiniol dros Asedau, y Cynghorydd Mark Pritchard,
“Bydd ein buddsoddiad yn dod â’r adeilad rhestredig Gradd II amlwg hwn yn ôl i ddefnydd cyhoeddus, gan wasanaethu fel canolbwynt i’r diwydiannau creadigol yng nghanol Wrecsam. “Mae’r Hen Lyfrgell wedi chwarae rhan bwysig iawn yn ein gorffennol a bydd y cynllun adfywio llawn dychymyg hwn yn rhoi bywyd newydd iddi ac yn sicrhau y bydd yn chwarae rhan yr un mor bwysig yn ein dyfodol.”
Dywedodd yr Aelod Arweiniol dros yr Economi ac Adfywio, y Cynghorydd Nigel Williams, “Mae’r prosiect hwn yn un o’r ymrwymiadau a’r buddsoddiadau niferus rydyn ni’n eu gwneud i wella seilwaith ac apêl Wrecsam fel cyrchfan a dinas uchelgeisiol a bywiog.”
