Mae Pencampwriaeth Ewropeaidd Dan 19 UEFA yn mynd i ogledd Cymru yr haf hwn, gyda Wrecsam yn chwarae rhan ganolog fel un o leoliadau cynhaliol allweddol y twrnameintiau – a’r lleoliad ar gyfer y rownd derfynol.
Cadarnhawyd drefn y grwpiau yn swyddogol ym Mhrifysgol Wrecsam yn ddiweddar ar gyfer yr wyth gwlad sy’n cystadlu.
Mae Cymru wedi eu cynnwys yng Ngrŵp A ochr yn ochr â Denmarc, yr Almaen a Sbaen.
Bydd holl gemau grŵp Cymru yn cael eu cynnal ar y Cae Ras – y stadiwm pêl-droed rhyngwladol hynaf yn y byd, gan gynnig cyfle gwych i gefnogwyr lleol brofi pêl-droed rhyngwladol ieuenctid elitaidd ar garreg eu drws.
Yn y cyfnod cyn y twrnamaint, mae Cymdeithas Bêl-droed Cymru yn cynllunio taith y tlws ar draws ysgolion lleol yn Wrecsam, Sir Ddinbych a Gwynedd – gan helpu i ysbrydoli’r genhedlaeth nesaf o chwaraewyr a chefnogwyr.
Dywedodd y Cynghorydd Mark Pritchard, Aelod Arweiniol Cyngor Wrecsam, “Roedd yn bleser bod yn bresennol yn y digwyddiad cadarnhau trefn y grwpiau ym Mhrifysgol Wrecsam, a gweld â’m llygaid fy hun y cyffro sy’n adeiladu o amgylch y twrnamaint mawreddog hwn.”
“Mae cynnal gemau fel rhan o rowndiau terfynol Euro dan 19 UEFA yn gyfle gwych i Wrecsam. Mae nid yn unig yn ein rhoi ar y llwyfan rhyngwladol ond hefyd yn tynnu sylw at gryfder ein seilwaith chwaraeon a’n hangerdd am bêl-droed.”
“Mae digwyddiadau fel hyn yn gadael etifeddiaeth barhaol, gan ysbrydoli pobl ifanc ar draws ein cymunedau i gymryd rhan mewn chwaraeon.”
Ychwanegodd Alwyn Jones, Prif Weithredwr Cyngor Wrecsam “Roedd yn fraint bod yn bresennol yn y digwyddiad cadarnhau trefn y grwpiau ym Mhrifysgol Wrecsam, bydd croesawu timau a chefnogwyr o bob cwr o Ewrop yn dod â manteision gwirioneddol i’r economi leol, wrth hefyd arddangos Wrecsam fel cyrchfan fywiog a chroesawgar.”
“Mae digwyddiadau o’r raddfa hon yn gyfle gwych i hyrwyddo’r fwrdeistref sirol ar lwyfan rhyngwladol a chreu ymdeimlad parhaol o falchder yn ein cymunedau.”
Bydd Wrecsam yn cynnal gêm agoriadol y twrnamaint, wrth i Gymru wynebu Sbaen ar y Cae Ras ar 28 Mehefin am 6pm.
Mae rhagor o fanylion am gemau a thocynnau ar gael ar wefan Cymdeithas Bêl-droed Cymru.
