Mae Cornel Clip Llyfrgell Wrecsam yn rhoi mynediad i ymwelwyr at gasgliad unigryw o hanes darlledu a ffilm Cymru.
Yn rhan o brosiect Archif Ddarlledu Cymru dan arweiniad Llyfrgell Genedlaethol Cymru, mae Corneli Clip yn galluogi pobl i ddarganfod amrywiaeth eang o eitemau ffilm, fideo a sain wedi’u digido o bob cwr o Gymru.
Mae peth o gynnwys Clip Cymru ar gael ar-lein, ac ychydig dros 1000 o glipiau ar gael i’w mwynhau gartref, dim ond mewn lleoliadau Corneli Clip, fel un Llyfrgell Wrecsam, mae modd gweld yr archif ehangach.
Mae’r casgliad yn cynnwys dros 400,000 o eitemau radio a theledu yn dyddio’n ôl i’r 1930au, ochr yn ochr â ffilmiau hanesyddol o’r cyfnod 1898 ymlaen.
Dywedodd y Cynghorydd Beverley-Parry Jones, yr Aelod Arweiniol â Chyfrifoldeb dros Lyfrgelloedd “Rydyn ni’n falch iawn o weld y Gornel Clip ar gael yn Llyfrgell Wrecsam. Mae’n rhoi cyfle i bobl ddarganfod a mwynhau rhan ddiddorol o hanes Cymru yma yn eu llyfrgell leol ac yn helpu i ddod â’n treftadaeth yn fyw i drigolion ac ymwelwyr fel ei gilydd.”
Dywedodd y Cynghorydd Paul Roberts, yr Aelod Arweiniol â Chyfrifoldeb dros Archifau a Chofnodion “Mae’r Gornel Clip newydd yn ychwanegiad i’w groesawu i Lyfrgell Wrecsam. Bydd yn helpu i gadw a rhannu deunydd archif pwysig, ac yn rhoi cyfle i bobl ddarganfod mwy am hanes darlledu Cymru a lle Wrecsam ynddo.”
Mae rhagor o wybodaeth am y Gornel Clip ar gael ar Wefan Llyfrgell Genedlaethol Cymru.
I gael mynediad at y cynnwys i gyd, bydd angen i ymwelwyr gofrestru am ddim ar gyfer tocyn darllenwyr y Llyfrgell Genedlaethol. Gellir gwneud hyn gartref ar Wefan Llyfrgell Genedlaethol Cymru, neu yn ystod eich ymweliad â’r llyfrgell.
Mae’r Gornel Clip ar y llawr cyntaf, ac mae lifft ar gael.
Gallwch ddefnyddio’r Gornel Clip am ddim yn ystod oriau agor Llyfrgell Wrecsam, dydd Llun i ddydd Gwener 9am-6pm a dydd Sadwrn 9am-4pm, heb fod angen cadw lle.
Cynghorir grwpiau i drafod dyddiadau, amseroedd a gofynion gyda’r llyfrgell yn gyntaf os hoffent ymweld â’r gornel Clip.
Gellir cysylltu â Llyfrgell Wrecsam drwy e-bost ar library@wrexham.gov.uk neu dros y ffôn ar 01978292090.
