Diolch i waith swyddogion gwarchod y cyhoedd yn Wrecsam, mae un siop ddiodydd drwyddedig wedi colli ei thrwydded ac mae siop gyfleus wedi cael gorchymyn cau am 3 mis a roddwyd gan Lys Ynadon Wrecsam.
Rhoddwyd y gorchymyn cau am 3 mis yn erbyn International Minimarket ar 22 Stryt y Brenin yng Nghanol y Ddinas.
Rhoddwyd y gorchymyn yn dilyn cais i’r llys gan swyddogion Safonau Masnach a oedd yn amlinellu cyfres o werthiannau ac atafaeliadau cynhyrchion anghyfreithlon dros y misoedd diwethaf.
Mae’r gorchymyn yn golygu bod yr eiddo wedi ei gau a’i gloi a bydd yn aros fel hyn tan 16 Hydref.
- Cofrestru -
Yn dilyn cais gan Safonau Masnach am adolygiad o’r drwydded yn Wrexham Lifestyle ar 106 Ffordd Rhosddu, bu i Is-bwyllgor Trwyddedu’r Cyngor diddymu eu trwydded alcohol.
Mae’r siop wedi bod yn gysylltiedig â gwerthu tybaco a fêps anghyfreithlon ers amser maith ac mae hefyd wedi bod yn gwerthu alcohol am brisiau is na’r isafswm ar gyfer uned o alcohol. Ym mis Mai eleni, cafodd y deiliad trwydded, Rebaar Mahmood, ei ddyfarnu’n euog am dorri amodau ei drwydded drwy fethu â chael system teledu cylch caeëdig sy’n gweithio yn y siop. Mae’r siop wedi cau ar hyn o bryd oherwydd gorchymyn cau a roddwyd gan Lys Ynadon Wrecsam ym mis Mai gan gau’r eiddo tan ganol mis Awst. Mae’r dirymiad yn golygu os bydd y siop yn ail-agor, ni fydd yn gallu gwerthu alcohol.
Mae’n anghyfreithlon gwerthu cynnyrch fêp i unrhyw un dan 18 oed
Mae fêpio wedi dod yn fwy a mwy poblogaidd yn ystod y deng mlynedd ddiwethaf ac fe’i cydnabyddir yn eang fel ffordd effeithiol o roi’r gorau i ysmygu tybaco. Fodd bynnag, yn fwy diweddar, mae diddordeb mewn fêps tafladwy wedi ffrwydro ac mae pobl sydd erioed wedi ysmygu yn rhoi cynnig arnynt. Mae’n anghyfreithlon gwerthu cynnyrch fêp i rai dan 18 oed, ond er hyn, mae fêps wedi dod yn boblogaidd ymysg pobl ifanc ac mae llawer o’r cynnyrch sydd ar gael yn apelio i blant gyda’u blas melys a phecynnu llachar. Mae rhai cynnyrch anghyfreithlon wedi defnyddio enwau fferins poblogaidd i’w hyrwyddo hyd yn oed.
Er ei fod yn llawer llai niweidiol nag ysmygu tybaco, nid yw defnyddio fêps heb ei risgiau chwaith. Oherwydd hynny, mae’r gyfraith yn gosod cyfyngiadau penodol ar fêps tafladwy gydag uchafswm capasiti ac uchafswm cryfder nicotin. Mae gofynion labelu caeth hefyd. Roedd fêps anghyfreithlon fel y rhai a ddarganfuwyd yn The Vape Shop yn groes i’r cyfyngiadau hyn gan achosi niwed sylweddol posibl i iechyd y bobl oedd yn eu defnyddio.
Dywedodd yr Aelod Arweiniol Gwarchod y Cyhoedd, y Cynghorydd Hugh Jones, “Mae’r cynnydd cyflym yn nifer y bobl a phlant sydd erioed wedi ysmygu ond sy’n defnyddio fêps yn peri pryder mawr ac mae’n dda gweld bod Llywodraeth Cymru a Llywodraeth y DU yn ystyried deddfwriaeth newydd i fynd i’r afael â’r broblem.
“Mae gwerthu cynnyrch anghyfreithlon a thanbrisio alcohol yn ein cymuned yn peri pryder penodol ac ni fyddwn yn meddwl ddwywaith cyn defnyddio’r grym cyfreithiol sydd gennym i amddiffyn iechyd a lles ein pobl ifanc. Rwyf yn croesawu canlyniad y gweithredu hwn gyda’r effaith ymarferol iawn o gau’r eiddo am gyfnod hir.
“Mae’r tarfu hwn yn effeithio nid yn unig ar berchennog y busnes ond hefyd ar berchennog yr eiddo na fydd yn gallu defnyddio na rhentu’r eiddo at unrhyw ddiben am y 3 mis nesaf. Os ydych chi’n landlord neu asiant eiddo â thenantiaid sy’n torri’r gyfraith fel hyn, dylech fod yn ymwybodol y gellir cymryd camau tebyg sy’n arwain at fethu â defnyddio’r eiddo drwy orchymyn y Llys.”
Derbyniwch y newyddion diweddaraf ar sgamiau, galw nôl cynnyrch a materion diogelu’r cyhoedd eraill
Efallai yr hoffech hefyd ddarllen Cau siop gyfleustodau â thrwydded Wrexham Lifestyle am 3 mis
