Mae arwyddion rhybuddio dros dro wedi’u gosod o amgylch ardal Johnstown fel rhan o’r gwaith parhaus i annog perchnogaeth gyfrifol ar gŵn a lleihau baw cŵn mewn cymunedau lleol.
Yn dilyn dadansoddiad misol o adroddiadau am faw cŵn ar draws y Fwrdeistref Sirol, nodwyd Johnstown fel ardal lle gallai ymwybyddiaeth a phatrolau ychwanegol helpu i fynd i’r afael â phroblemau sy’n codi dro ar ôl tro.
Mae’r arwyddion dros dro yn atgoffa perchnogion cŵn y dylid cadw cŵn ar dennyn wrth ymyl y briffordd gyhoeddus, bod yn rhaid codi baw cŵn a bod patrolau gorfodi yn digwydd yn yr ardal.
Bydd yr arwyddion yn aros yn eu lle am sawl wythnos cyn cael eu symud i leoliad arall a nodir trwy waith adrodd a dadansoddi misol yn y dyfodol.
Dywedodd y Cynghorydd David A Bithell, yr Aelod Arweiniol dros yr Amgylchedd, “Mae gadael baw cŵn heb ei godi yn annerbyniol ac yn cael effaith negyddol ar ein cymunedau, ein mannau cyhoeddus a’r bobl sy’n eu defnyddio”
“Mae’r rhan fwyaf o berchnogion cŵn yn gyfrifol ac yn glanhau ar ôl eu hanifeiliaid anwes, ond yn anffodus mae lleiafrif bach yn parhau i anwybyddu eu cyfrifoldebau. Mae’r arwyddion dros dro hyn yn nodyn atgoffa amlwg bod yn rhaid i berchnogion cŵn godi baw eu cŵn a’u cadw dan reolaeth.”
“Trwy dargedu ardaloedd a nodwyd trwy adroddiadau lleol, gallwn gymryd dull mwy penodol at godi ymwybyddiaeth, annog ymddygiad cyfrifol a helpu i gadw ein strydoedd a’n mannau cyhoeddus yn lân.”
Nod y fenter yw codi ymwybyddiaeth, annog perchnogaeth gyfrifol ar gŵn a chynnal mannau cyhoeddus glanach, mwy diogel i bawb.
Atgoffir trigolion i gario bagiau bob amser wrth gerdded eu ci, glanhau yn syth ar ôl eu hanifail anwes, a gwaredu baw eu ci yn gyfrifol.
