Erthygl Gwadd – Ysgol Gynradd Minera VA
Mae Ysgol Gynradd y Mwynglawdd wedi nodi ei phen-blwydd yn 175 oed gydag wythnos fywiog yn llawn dathliadau, gan ddod â disgyblion, staff, teuluoedd a’r gymuned ehangach ynghyd i anrhydeddu ei hanes cyfoethog a’i hetifeddiaeth barhaol.
Yn y cyfnod cyn wythnos y pen-blwydd, cymerodd disgyblion brwdfrydig ran mewn cyfres o weithgareddau creadigol ac ymarferol. Roedd y plant wedi pobi cacennau sbwng Fictoria traddodiadol a chacennau cri, gwnïo clytiau unigol ar gyfer tapestri arbennig i ddathlu’r 175 mlwyddiant, a chyfrannu at adnewyddu llyfrgell yr ysgol – gan adael etifeddiaeth barhaol i genedlaethau’r dyfodol.
Dechreuodd y dathliadau yn swyddogol gyda grŵp Dosbarth Navigators yn cydweithio â’r artist Andy Birch i ddylunio a chynhyrchu gwaith celf graffiti trawiadol wedi’i ysbrydoli gan hanes yr ysgol. Roedd y prosiect yn gyfle unigryw i ddisgyblion fynegi eu creadigrwydd wrth ddysgu am orffennol Ysgol y Mwynglawdd.
Ddydd Mawrth, daeth cymuned yr ysgol at ei gilydd er mwyn cynnal seremoni claddu capsiwl amser symbolaidd. Dewisodd disgyblion eitemau sy’n cynrychioli bywyd yn 2026, gan sicrhau y bydd cenedlaethau’r dyfodol yn cael cipolwg ar y byd heddiw pan fydd y capsiwl yn cael ei agor. I nodi’r achlysur ymhellach, plannwyd eirinen goch ar dir yr ysgol – fel nodyn atgoffa parhaus o’r pen-blwydd carreg filltir.
Ddydd Mercher, cynhaliwyd gwasanaeth coffa arbennig iawn yn Eglwys y Santes Fair yn y Mwynglawdd. Dan arweiniad y plant, roedd y gwasanaeth yn myfyrio ar 175 mlynedd o addysg yn Ysgol y Mwynglawdd ac yn dathlu’r ymdeimlad cryf o gymuned sy’n parhau i’w diffinio.
Roedd y Diwrnod Agored ddydd Iau yn un o uchafbwyntiau’r wythnos, gan groesawu nifer fawr o ymwelwyr, gan gynnwys cyn-ddisgyblion, staff a chyfeillion yr ysgol. Roedd y digwyddiad yn cynnig cyfle gwych i rannu atgofion, archwilio hanes yr ysgol, ac ailgysylltu â hen gyd-ddisgyblion. Roedd y ffaith bod cyn-aelodau staff wedi dychwelyd yn ychwanegu at yr ymdeimlad o hiraeth a dathlu.
Daeth yr wythnos i ben gyda pharti hyfryd ar thema Fictoraidd, lle camodd disgyblion yn ôl mewn amser i brofi bywyd fel y byddai yn ystod blynyddoedd cynnar yr ysgol. Cofleidiodd plant a staff y thema gyda gwisgoedd Fictoraidd trawiadol a mwynhau gemau traddodiadol. Cafodd y dathliad ei wneud hyd yn oed yn fwy arbennig wrth i ddisgyblion flasu’r cacennau sbwng Fictoria a chacennau cri roedden nhw wedi’u paratoi yn gynharach yn yr wythnos.
Roedd y dathliadau pen-blwydd yn llwyddiant ysgubol, gan dynnu sylw nid yn unig at hanes hir a balch yr ysgol ond hefyd ei phresennol bywiog a’i dyfodol disglair.
Mae Ysgol Gynradd y Mwynglawdd yn estyn ei diolch diffuant i bawb a gyfrannodd at wneud yr wythnos mor gofiadwy. Edrychwn ymlaen at y 175 mlynedd nesaf o ddysgu, cymuned a chyflawniad.
Dywedodd y Cynghorydd Phil Wynn, yr Aelod Arweiniol dros Addysg, “Mae 175 mlynedd yn garreg filltir ryfeddol i Ysgol Gynradd y Mwynglawdd, ac mae hwn yn gyfle gwych i ddathlu hanes balch yr ysgol, ysbryd cymunedol cryf a chyfraniad parhaol i genedlaethau o deuluoedd lleol.”
“Mae’n wych gweld disgyblion, staff, teuluoedd, cyn-ddisgyblion a’r gymuned ehangach yn dod at ei gilydd i nodi’r achlysur mewn ffordd mor greadigol a chofiadwy. O’r capsiwl amser i’r dathliadau ar thema Fictoraidd, mae’r wythnos yn amlwg wedi bod yn deyrnged addas i orffennol yr ysgol gan hefyd edrych ymlaen at y dyfodol.”
