Mae Meysydd Chwarae Cymru wedi bod mewn partneriaeth â Chyngor Wrecsam ers dechrau’r 1960au ac ers hynny rydyn ni wedi diogelu 37 o fannau gwyrdd a 10 parc gwledig gyda 300 o fannau wedi’u diogelu ledled Cymru bellach.
Mae gan Wrecsam draddodiad hir o hyrwyddo a chydnabod pwysigrwydd ein mannau gwyrdd a byddwn yn parhau i weithio gyda Meysydd Chwarae Cymru.
Yn ddiweddar i gydnabod y bartneriaeth werthfawr hon, gwahoddwyd swyddogion CBSW Nicola Ellis a Craig Youens i arddwest ym Mhalas Buckingham i ddathlu canlyniadau llwyddiannus y bartneriaeth.
Dywedodd yr Aelod Arweiniol dros yr Amgylchedd, y Cynghorydd Terry Evans: “Mae cymaint o waith da yn mynd rhagddo heb gael ei gydnabod, felly mae’n wych gweld bod ein partneriaeth lwyddiannus wedi cael ei chydnabod a’i chanmol yn y digwyddiad hwn.”
Penodwyd Ei Uchelder Brenhinol Tywysog Cymru yn Noddwr Meysydd Chwarae Cymru yn 2024.
Dywedodd y Swyddog Mannau Agored, Nicola Ellis: “Cefais fy nghyflwyno i Ei Uchelder Brenhinol y Tywysog William a oedd â diddordeb yn ymwneud Wrecsam â Meysydd Chwarae Cymru. “Fe siaradon ni am fannau gwyrdd Wrecsam a sut rydyn ni’n eu diogelu er mwyn i genedlaethau’r dyfodol fwynhau’r fioamrywiaeth yn ogystal â’r manteision iechyd corfforol a lles meddyliol. “Soniais hefyd am y gwaith gwych y mae ein gwirfoddolwyr yn ei wneud yn ogystal â phwysigrwydd gwarchod ein caeau pêl-droed – ymatebodd y tywysog gyda gwên a dywedodd nad yw’n syndod bod tîm Wrecsam yn gwneud yn dda eleni!”
Sefydlwyd Meysydd Chwarae Cymru ym 1925 i ddiogelu caeau chwarae, meysydd chwarae a mannau gwyrdd pan fo cymaint o waith adeiladu’n digwydd yn ein trefi a’n dinasoedd.
Roedd yr ymddiriedolaeth am sicrhau bod gan bob cymuned fynediad at barciau, caeau chwarae, a mannau gwyrdd.
