Mae Gwesty’r Hand yn y Waun – un o dirnodau hanesyddol mwyaf eiconig Wrecsam yn dyddio’n ôl i’r 1600au cynnar – dan berchnogaeth newydd.
Yn ddiweddar, prynodd TLC Holdings Group Ltd y gwesty, sydd wedi’i leoli dafliad carreg o Gastell y Waun a Chamlas Llangollen. Mae’r gwesty 14 ystafell yn llawn hanes ac wedi bod yn gyrchfan boblogaidd ers amser maith i ymwelwyr sy’n crwydro gororau Cymru.
Mae’r perchnogion newydd yn awyddus i wella cynnig Gwesty’r Hand i dwristiaid a’r gymuned leol. Mae’r cynlluniau yn cynnwys adnewyddiadau mewnol, uwchraddio cynaliadwyedd, a phrofiadau ymwelwyr newydd – gan gynnwys partneriaethau posibl gydag atyniadau a chyflenwyr lleol.
Yn ddiweddar, ymwelodd yr Aelod Arweiniol dros yr Economi, Busnes a Thwristiaeth, y Cynghorydd Nigel Williams, â’r eiddo rhestredig Gradd II i gwrdd â’r tîm newydd a chlywed mwy am eu cynlluniau buddsoddi. Dywedodd: “Roeddwn i’n falch o gwrdd â pherchnogion newydd Gwesty’r Hand ac i weld beth maen nhw wedi’i gynllunio ar gyfer y gwesty. Mae’n un o’r gwestai hynaf yng ngogledd-ddwyrain Cymru ac mae’n boblogaidd gyda phobl leol a thwristiaid felly rwy’n falch o glywed eu bod yn bwriadu parhau i uwchraddio, tyfu’r busnes a chynyddu ei rôl yng nghynnig twristiaeth Wrecsam.”
Dywedodd David Kamau, Cyfarwyddwr TLC Holdings Group Ltd: “Roedd yn bleser croesawu’r Cynghorydd Nigel Williams i Westy’r Hand a rhannu ein cynlluniau ar gyfer y bennod newydd gyffrous hon. Er bod y gwesty wedi’i leoli’n falch yn y Waun, rydym yn rhannu gweledigaeth ehangach o gyfrannu at economi dwristiaeth sy’n tyfu yn Wrecsam. Ein nod yw sicrhau bod Gwesty’r Hand yn dod yn gyrchfan allweddol i ymwelwyr ledled y rhanbarth – gan gyfuno treftadaeth, lletygarwch a chymuned. Yn TLC Holdings Group Ltd, rydym yn gyffrous i fuddsoddi yn Wrecsam a chwarae ein rhan wrth lunio ei phennod nesaf.”
Derbyniwch y newyddion a’r wybodaeth ddiweddaraf yn syth i’ch mewnflwch.
