Bydd trigolion yn elwa o amserlen well ar Wasanaeth 34, sy’n cysylltu Wrecsam â Threfalun trwy Pandy, Llai a Burton.
O ddydd Llun 1 Mehefin 2026, bydd y gwasanaeth yn cael ei weithredu gan Arriva Bus Wales a bydd yn weithredol o ddydd Llun i ddydd Sadwrn, ac eithrio gwyliau banc.
Bydd y gwasanaeth gwell yn darparu pedair taith i’r ddau gyfeiriad bob dydd, gan gynnig cynnydd sylweddol o’i gymharu â’r amserlen bresennol, sy’n gweithredu ar ddydd Mercher, dydd Gwener a dydd Sadwrn gyda thair taith lawn ar y diwrnodau hynny.
Bydd y llwybr yn parhau i wasanaethu cymunedau gan gynnwys Pandy, Gwersyllt, Bradle, Llai, Burton a Threfalun, gan ddarparu gwell cysylltiadau â Wrecsam a’r ardaloedd cyfagos.
Bydd y gwasanaeth newydd hefyd yn defnyddio bws hygyrch llawr isel sy’n fwy o faint, gan wella hygyrchedd i deithwyr.
Efallai y bydd trigolion yn gweld cerbydau Arriva ar y llwybr cyn y dyddiad cychwyn fel rhan o wiriadau amseru ac er mwyn ymgyfarwyddo â’r llwybr.
Dywedodd y Cynghorydd David A Bithell, yr Aelod Arweiniol sy’n gyfrifol am Drafnidiaeth Strategol: “Mae hyn yn newyddion i’w groesawu i drigolion ar hyd llwybr Gwasanaeth 34. Y prif welliant yw y bydd y gwasanaeth bellach yn gweithredu 6 diwrnod yr wythnos, yn hytrach na 3, gyda 4 taith i’r ddau gyfeiriad bob dydd.”
“Mae gwasanaethau bws lleol da yn hanfodol i helpu pobl i gael mynediad at siopau, apwyntiadau, gwaith, addysg a chyfleoedd cymdeithasol, a bydd yr amserlen well hon yn darparu gwell cysylltiadau i gymunedau rhwng Wrecsam, Pandy, Llai, Burton a Threfalun.”
“Rwy’n falch ein bod ni, gan weithio gydag Arriva Bus Wales, yn gallu adfer lefel gryfach o wasanaeth ar y llwybr hwn a chefnogi trigolion sy’n dibynnu ar drafnidiaeth gyhoeddus leol.”
Diwrnod cyntaf yr amserlen newydd fydd dydd Llun 1 Mehefin 2026. Anogir teithwyr i wirio’r amserlen ar wefan Arriva Cymru cyn teithio.
