Mae’r gwaith ar ddatblygiad tai Dull Adeiladu Modern cyntaf Cyngor Wrecsam yn mynd rhagddo’n dda, ac mae gam arall yn nes at gael ei gwblhau.
Bydd y prosiect, sy’n anelu at ddarparu tai ynni-effeithlon o ansawdd uchel, yn cynnwys bloc fflatiau deulawr sy’n cynnwys chwe fflat un ystafell wely, sy’n ddelfrydol ar gyfer defnydd sengl neu gyplau.
Mae’r cartrefi hyn bellach yn agosáu at gael eu cwblhau, gyda’r dyddiad cwblhau targedig wedi’i osod ar gyfer diwedd mis Mai.
Mae cerrig milltir allweddol eisoes wedi’u cyflawni, gan gynnwys gosod ffenestri a drysau, gyda drysau patio ar y llawr gwaelod yn caniatáu mynediad hawdd i fannau awyr agored.
Mae Dulliau Adeiladu Modern (DAMau) yn cynnig manteision amgylcheddol sylweddol, gan leihau’r effaith amgylcheddol sy’n gysylltiedig â phrosesau adeiladu traddodiadol. Y tu hwnt i’r cam adeiladu, mae DAMau yn ymgorffori technolegau a strwythurau arloesol sy’n sicrhau effeithlonrwydd ynni parhaus i drigolion.
Fel rhan o ymrwymiad y cyngor i gynaliadwyedd, mae paneli ffotofoltäig wedi’u gosod ar y to. Mae’r paneli hyn yn cynhyrchu ynni adnewyddadwy o olau’r haul, gan leihau allyriadau carbon a chyfrannu at fywyd mwy cynaliadwy.
Mae manteision eraill paneli ffotofoltäig yn cynnwys biliau ynni is posibl i breswylwyr ac ôl troed amgylcheddol llai.
Wrth edrych ymlaen, mae’r cam nesaf yn cynnwys gosod pwyntiau gwefru cerbydau trydan ar diroedd allanol yr eiddo. Mae’r fenter hon yn gam ymlaen arall wrth hyrwyddo cynaliadwyedd.
Mae ceir trydan yn helpu i leihau allyriadau a gwella ansawdd aer, gan gyfrannu at wella iechyd y cyhoedd. Trwy integreiddio gorsafoedd gwefru i mewn i’r eiddo cyngor newydd yma, mae Cyngor Wrecsam yn hwyluso bywydau perchnogion cerbydau trydan ac yn annog mwy o bobl i symud i opsiynau trafnidiaeth gwyrddach, lle bo hynny’n bosibl.
Mae’r rendrad allanol wedi’i gwblhau, gan wella ymddangosiad yr eiddo yn sylweddol. Gyda’r sgaffaldiau bellach wedi’u symud ymaith, mae’r ffocws yn symud i’r gwaith mewnol.
Y tu mewn, mae’r paratoadau ar gyfer plastro wedi’u cwblhau, ac mae gwaith plastro yn digwydd ar hyn o bryd, gan ddod â gwelliannau gweledol sylweddol i’r tu mewn i’r eiddo.
Mae camau cychwynnol y gwaith saer a phlymio wedi’u cwblhau, gan gynnwys gosod gwifrau trydanol a gosod systemau dŵr poeth ac oer, gan baratoi’r fflatiau ar gyfer defnydd preswyl yn y dyfodol.
Dywedodd y Cynghorydd David A Bithell, yr Aelod Arweiniol dros Dai, “Rydyn ni’n falch o weld yr adeilad yn dod at ei gilydd. Bydd yn darparu chwe chartref newydd ar gyfer meddiannaeth sengl neu gyplau, gan gyfrannu at ymrwymiad Wrecsam i ddarparu opsiynau tai ynni-effeithlon o ansawdd uchel.”
