Yn ddiweddar, mynychodd Maer Wrecsam, y Cynghorydd Jeremy Kent, sesiwn rhoi gwaed gan Wasanaeth Gwaed Cymru a gynhaliwyd yn Eglwys y Santes Farged yn Wrecsam.
Tra yno, torchodd ei lewys a rhoi rhywfaint o waed i helpu tuag at yr achos a allai achub bywydau.
Gall rhoi gwaed fod yr anrheg fwyaf gwerth chweil a hanfodol y gallwch ei roi i rywun mewn angen. Yng Nghymru yn unig, mae angen 350 o roddion y dydd ar ysbytai i gefnogi cleifion.
Mae Gwasanaeth Gwaed Cymru angen rhoddwyr o bob cefndir i helpu i gadw i fyny â’r galw dyddiol am gyflenwadau. Mae gan un rhodd yn unig y potensial i achub tri chlaf. Mae’r broses yn gyflym, yn syml ac yn gwbl ddiogel. Mae unrhyw un sy’n bodloni’r meini prawf hwn yn gymwys i roi gwaed, os ydych chi:
- Rhwng 17 a 66 oed (ar gyfer eich rhodd gyntaf)
- Yn pwyso dros 7 stôn 12 pwys (50kg)
- Yn iach ac nid ydych yn destun eithriadau meddygol
Mae dros bum clinig sy’n cynnal sesiynau rhoi gwaed yn Wrecsam a’r ardaloedd cyfagos. Gallwch ddod o hyd i’ch clinig agosaf a’r holl wybodaeth ei hangen arnoch am roi gwaed drwy fynd draw i wefan Gwasanaeth Gwaed Cymru.
Wrth siarad am ei ymweliad diweddar â’r clinig, dywedodd y Maer, “Hoffwn annog unrhyw un sy’n meddwl am roi gwaed i ddod draw i gymryd rhan yn un o’ch clinigau lleol. Mae’n gyflym ac yn hawdd ac, am yr ychydig eiliadau y mae’n eu cymryd i ni roddwyr, gallai o bosibl roi blynyddoedd i rywun mewn angen.
“Mae’n achos gwerth chweil y mae ein hysbytai yn dibynnu arno i barhau i wneud pobl yn ein cymuned yn well. Pa mor hyfryd fyddai gwybod eich bod wedi helpu i achub bywyd trwy eich gweithred o garedigrwydd.
“Roedd yn bleser mawr i mi roi ychydig ddiferion o waed heddiw gyda’r gobaith y gallai fynd tuag at y driniaeth hanfodol sydd ei hangen ar rywun. Boed i lwyddiant holl dîm Gwasanaeth Gwaed Cymru a’r holl wirfoddolwyr arwrol barhau”.
