Diolch i Gyllid Cymorth Brys Llywodraeth Leol yng Nghymru, mae £60,000 y flwyddyn yn cael ei ddarparu gan Gyngor Wrecsam i Fanc Bwyd Wrecsam ar gyfer y blynyddoedd 2025-26 a 2026-27.
Mae’r cymorth ariannol hwn yn cael ei roi yn dilyn argymhelliad a chymeradwyaeth gan y Swyddog Costau Byw a’r Gweithgor Aelodau a’r Bwrdd Gweithredol yn ystod mis Tachwedd 2025.
Dywedodd y Cynghorydd David A Bithell, Cadeirydd y Swyddog Costau Byw a’r Gweithgor Aelodau, “Bydd y cyllid hwn yn cael ei ddefnyddio gan Fanc Bwyd Wrecsam i brynu cyflenwadau bwyd ac offer storio ychwanegol,gan ehangu eu gallu i ddiwallu anghenion eu cwsmeriaid sy’n teimlo effaith yr argyfwng costau byw yn uniongyrchol.”
Beth mae’r Banc Bwyd yn ei wneud
Trwy system atgyfeirio talebau, mae’r Banc Bwyd yn darparu o leiaf dri diwrnod o fwyd brys.
Mae unrhyw un sy’n cael ei hun mewn sefyllfa lle mae’n cael trafferth talu costau bwyd yn gallu cysylltu ag asiantaeth atgyfeirio am gymorth. (Mae hyn yn cynnwys llawer o wahanol gysylltiadau atgyfeirio megis swyddogion cymorth tai, canolfannau plant, ymwelwyr iechyd a gweithwyr cymdeithasol.)
Yna mae’r asiantaeth leol yn gallu rhoi taleb fwyd i chi, y gallwch chi fynd â hi i unrhyw un o’r 8 canolfan banc bwyd yn Wrecsam.
Dywedodd y Cynghorydd Beverley Parry-Jones, yr Aelod Arweiniol dros Dlodi, “Wrth i ni ddechrau’r gaeaf eto, rydyn ni’n cydnabod mai dyma adeg o’r flwyddyn lle mae pwysau ariannol sylfaenol yn aml yn cynyddu, yn enwedig gyda chostau gwresogi; ac mae hyn yn gallu effeithio hefyd ar faint o fwyd mae aelwyd yn gallu ei fforddio. Mae Banc Bwyd Wrecsam yn fenter hanfodol sy’n cefnogi pobl sy’n wynebu tlodi bwyd, gan roi hwb i wydnwch cymunedol trwy ei waith parhaus.”
Dywedodd Suzanne Nantcurvis, Cadeirydd Ymddiriedolwyr Banc Bwyd Wrecsam, “Fel sefydliad rheng flaen sy’n mynd i’r afael â thlodi yn ein cymuned, mae Banc Bwyd Wrecsam yn falch bod Cyngor Wrecsam wedi cydnabod gwaith a gweledigaeth y Banc Bwyd trwy ddyfarnu’r lefel sylweddol hon o gyllid ar gyfer y ddwy flynedd nesaf. Bydd yn ein galluogi i brynu cyflenwadau bwyd i gefnogi cleientiaid mewn sefyllfaoedd argyfwng ac yn rhoi cynaliadwyedd mawr ei angen i ni o ystyried ein bod wedi gwario £42k ar brynu bwyd ar gyfer ein parseli brys yn y flwyddyn ariannol ddiwethaf.
“Ar ben hynny, mae’r cyllid yn ein galluogi i fod yn flaengar yn ein dull strategol gan ein bod yn chwilio am atebion tymor hir i gleientiaid yn hytrach na chanolbwyntio ar reoli argyfwng.”
Efallai yr hoffech hefyd ddarllen: Dros 66? Gwiriwch a allech gael hwb i’ch incwm trwy Gredyd Pensiwn
Croeso Cynnes yn Tŷ Pawb – Gweithgaredd Crefft Gofod Cynnes Wythnosol Am Ddim gyda Phryd Poeth!
