Mae Cynllun Prydlesu Cymru, a ariennir gan Lywodraeth Cymru, wedi helpu Cyngor Bwrdeistref Sirol Wrecsam i ddod â nifer o dai gwag yn ôl i ddefnydd ers 2022.
Beth yw Cynllun Prydlesu Cymru?
Nod y cynllun yw rhoi mwy o fynediad at rentu preifat yng Nghymru, a’i wneud yn fwy fforddiadwy. Rhoi sicrwydd i ddeiliaid contract a hyder i berchnogion eiddo.
Dan y trefniant, bydd y Cyngor yn prydlesu eiddo gan berchnogion eiddo yn y sector preifat ac is-osod yr eiddo i’r rhai y mae ganddo ddyletswydd i’w gwarchod rhag mynd yn ddigartref.
- Cofrestru -
Hefyd, mae’r cynllun yn darparu ymyrraeth ychwanegol i fynd i’r afael ag eiddo gwag ac amodau tai gwael yn y sector preifat sy’n gallu cael effaith niweidiol ar gymunedau lleol.
Mae’r cynllun yn adnodd ychwanegol i’n Tîm Dewisiadau Tai sy’n ceisio symud teuluoedd ymlaen o lety dros dro.
Dan y cynllun, mae’r Cyngor yn cymryd rhwymedigaethau penodol o ran cynnal a chadw’r eiddo, ac mae’r rhent yn cael ei dalu i’r perchnogion. Gellir cynnig cymhelliant i ail-wneud i berchnogion eiddo pan nad yw’r eiddo’n bodloni’r isafswm safonau eiddo neu i wella ei sgôr Tystysgrif Perfformiad Ynni (EPC).
Bydd y cymhelliant ail-wneud yn grant o hyd at £5,000.
Gellir dod ag eiddo gwag i mewn i’r cynllun a byddant yn gymwys am grantiau cymhelliant uwch i ail-wneud. Gallai eiddo gwag fod yn gymwys am grant o hyd at £25,000. Bydd grantiau o fwy na £10,000 angen cymeradwyaeth gan Lywodraeth Cymru.
Cynigir cymhelliant i ail-wneud i berchnogion eiddo sy’n cofrestru â’r cynllun yn unig.
Dywedodd y Cynghorydd David Bithell, Aelod Arweiniol Tai, “Rydym yn falch o gael mynediad at gynllun megis Cynllun Prydlesu Cymru. Mae hyn yn caniatáu i ni gydweithio gyda landlordiaid lleol er mwyn dod â thai gwag yn ôl i ddefnydd ar draws Bwrdeistref Sirol Wrecsam.
“Mae’n braf gwybod bod y cynllun wedi bod yn llwyddiant ers iddo ddechrau yn 2022, i chwilio am eiddo y gallwn eu defnyddio, ac edrychwn ymlaen at roi’r wybodaeth ddiweddaraf am yr adeiladau nesaf i gael eu cwblhau dan y cynllun.
“Mae defnyddio eiddo fel y rhai yng Nghanol Dinas Wrecsam yn gwella ein heconomi leol ac yn helpu i fynd i’r afael â fforddiadwyedd rhentu preifat yng Nghymru.”
Ym mis Mawrth 2023, llwyddodd y Cyngor i brydlesu tri fflat yng nghanol y ddinas. Roedd lloriau uchaf yr adeilad wedi bod yn wag ac mewn cyflwr nad oedd posibl byw ynddynt ers nifer o flynyddoedd.
Gyda chymorth grantiau a benthyciadau, cafodd yr eiddo ei ail-wneud yn llwyr gan y perchnogion a bellach mae yno siop fodern ar y llawr gwaelod a thri fflat hunangynhwysol ar y lloriau uchaf. Ers iddynt gael eu defnyddio unwaith eto, mae’r fflatiau’n darparu cartref i dair aelwyd ddigartref.
Ar hyn o bryd, mae’r Cyngor yn gweithio gyda pherchnogion uned arall yng Nghanol Dinas Wrecsam. Mae’r tri adeilad teras wedi bod yn wag ers blynyddoedd ac wedi i’r gwaith gael ei gwblhau, bydd yno saith fflat hunangynhwysol â nifer amrywiol o ystafelloedd gwely.
I gael mwy o wybodaeth am Gynllun Prydlesu Cymru, ffoniwch ein Hasiantaeth Gosod Tai Leol ar 01978 315515 neu anfonwch e-bost at locallettings@wrexham.gov.uk.
