Wel mae’r gwaith caled wedi ei wneud ac mae’r beirniaid wedi ymweld â Wrecsam i feirniadu ein cais ar gyfer Cymru yn ei Blodau.
Mae canol y ddinas yn llawn lliw sy’n cyd-fynd â’r coed a’r llwyni presennol y mae ymwelwyr yn gyfarwydd â hwy.
Ychwanegiad arbennig eleni yw’r beiciau lliwgar sydd wedi eu troi’n gynwysyddion planhigion fel rhan o’r arddangosfeydd ac i groesawu Taith Prydain pan ddaw i Wrecsam ym mis Medi.
Hefyd mae yna lwybr coed newydd yng nghanol y Ddinasy gallwch ei ddilyn ac mae arwyddion peillio newydd wedi eu gosod yn y gwelyau i egluro’r fioamrywiaeth a’r rhesymau cynaliadwy pam fod rhai planhigion penodol wedi eu dewis.
Dechreuodd y beirniaid eu taith yn Holt lle mae preswylwyr wedi gwneud ymdrech wych i greu argraff ar y beirniaid, ac yna aethant i’r Ystâd Ddiwydiannol i weld y gwaith gwych mae CSFf wedi ei wneud o amgylch eu safle gwastraff gan greu pyllau, cychod gwenyn, gosod paneli solar a hyd yn oed darganfod math o degeirian prin. Oddi yno fe aethant ymlaen i Ysgol Uwchradd Rhosnesni lle gwelsant eu Gardd Synhwyraidd a rhandir sydd newydd ei greu cyn gorffen yng nghanol y ddinas.
“Gwych i fod yn ôl yng nghystadleuaeth Cymru yn ei Blodau”
Dywedodd y Cynghorydd Hugh Jones, Aelod Arweiniol yr Amgylchedd, “Mae’n wych i fod yn ôl yn y gystadleuaeth hon a phob man rwy’n edrych mae yna fôr o liwiau a dail. Mae staff yr amgylchedd, busnesau, preswylwyr a gwirfoddolwyr wedi gweithio’n eithriadol o galed i sicrhau nad oedd y beirniaid yn cael eu siomi ac rydym yn obeithiol o ganlyniad cadarnhaol iawn pan fydd y beirniaid yn rhyddhau eu canfyddiadau.
“Hoffwn fanteisio ar y cyfle hwn i ddiolch i bawb fu’n ymwneud â dod â’r sioe flodau hon i Wrecsam sy’n hybu’r arddangosfeydd hynny sydd eisoes yn fywiog ac yn rhai rydym yn falch o’u cael ym mhob cwr o’r fwrdeistref sirol.”
Dywedodd y Cynghorydd Nigel Williams, Aelod Arweiniol yr Economi ac Adfywio, “Ar hyd a lled canol y ddinas mae’r gwelyau blodau a’r cynwysyddion planhigion wedi eu hail ddylunio i gynnig cymysgedd hyfryd o blanhigion hafaidd yn ogystal ag ystod o beillwyr parhaol sy’n hoff o bryfetach a fydd yn cyd-fynd â’r ystod bresennol o lwyni a choed.
“Mae’r beiciau sydd wedi eu paentio gan blant lleol yn ychwanegiad hwyliog a groesawir i ganol y ddinas i nodi’r ffaith fod Wrecsam yn cynnal digwyddiad Taith Prydain ar 4 Medi.
“Hoffwn ddiolch i bawb sydd wedi ymwneud â dod â’r arddangosfa wych hon i’n strydoedd.”
Rhaid rhoi diolch arbennig hefyd i Gasglwyr Sbwriel Wrecsam gan fod eu gwaith gwych yn casglu sbwriel cyn i’r beirniaid gyrraedd wedi sicrhau fod y llwybr a’r ardaloedd eraill y maent yn gofalu amdanynt drwy gydol y flwyddyn yn ymddangos fel pe baent yn derbyn llawer o ofal.
Yn 2013 oedd y tro diwethaf i Wrecsam ymgeisio yn y gystadleuaeth.
Efallai yr hoffech hefyd ddarllen: Rydym yn paratoi ar gyfer Cymru yn ei Blodau
Derbyniwch y newyddion a’r wybodaeth ddiweddaraf yn syth i’ch mewnflwch.
