Mae’r paratoadau ar y gweill i gadw Bwrdeistref Sirol Wrecsam i symud yn ystod y misoedd oerach.
Mae tua 8,000 tunnell o halen mewn stoc ar hyn o bryd, tra bod timau’n paratoi’r fflyd graeanu, gan wirio ac ailgyflenwi mwy na 500 o finiau halen a phentyrrau halen cyn y gaeaf.
Mae 12 cerbyd graeanu mawr sy’n gweithredu ar 10 prif lwybr graeanu ar draws Wrecsam, sy’n cwmpasu tua 500km o ffyrdd.
Mae’r llwybrau hyn yn cynnwys ffyrdd allweddol A a B, llwybrau bysus strategol, prif lwybrau mynediad i ysgolion, llwybrau trwy ganol dinas Wrecsam a chanol trefi eraill ar draws y fwrdeistref sirol, ffyrdd ystadau diwydiannol a phrif feysydd parcio’r cyngor.
Mae gwaith cynnal a chadw yn ystod y gaeaf yn cynnwys llawer mwy nag anfon cerbydau graeanu allan pan fydd y tymheredd yn gostwng.
Trwy gydol cyfnod y gaeaf, mae staff hyfforddedig yn monitro rhagolygon tywydd manwl ac amodau ffyrdd i benderfynu pryd mae angen triniaeth ragofalus.
Derbynnir rhagolygon bob dydd, gyda chriwiau yn gallu ymateb i amodau newidiol y tu allan i oriau gwaith arferol.
Pan ragwelir rhew, bydd ffyrdd Blaenoriaeth 1 yn cael eu trin cyn i rew ffurfio lle bynnag y mae’r amodau yn caniatáu. Mae triniaeth lawn yn cymryd tua dwy awr a hanner.
Yn ystod cyfnodau o eira, mae’r llwybrau hyn yn cael eu trin ymlaen llaw lle bo’n bosibl a gall criwiau barhau i weithio ddydd a nos nes bod y rhwydwaith blaenoriaeth wedi’i glirio.
Hefyd, gellir gosod aradr eira ar gerbydau graeanu pan fo’r amodau yn gofyn am hynny.
Unwaith y bydd llwybrau Blaenoriaeth 1 wedi cael y driniaeth briodol, gall adnoddau symud i ffyrdd Blaenoriaeth 2, gan gynnwys ffyrdd ystadau tai, llwybrau mynediad i gymunedau gwledig llai ac unrhyw lwybrau bysus prysur sy’n weddill. Mae ffyrdd eraill yn cael eu trin fel y mae adnoddau ac amodau yn caniatáu.
Gall ymateb yn ystod y gaeaf hefyd ymestyn i droedffyrdd pan fydd eira wedi setlo neu yn ystod cyfnodau hir o dywydd rhewllyd.
Rhoddir blaenoriaeth i ardaloedd gan gynnwys canol dinas Wrecsam a chanol trefi ac ardaloedd siopa cyfagos, llwybrau o amgylch adeiladau dinesig ac ysbytai, cartrefi preswyl, canolfannau dydd, ysgolion, pontydd troed a safleoedd bws.
Darperir biniau halen hefyd mewn lleoliadau ar draws y fwrdeistref sirol i ganiatáu i drigolion a gyrwyr helpu i drin rhannau o’r briffordd gyhoeddus nad ydynt yn llwybrau graeanu blaenoriaeth.
Mae’r halen yn y biniau hyn i’w ddefnyddio ar y briffordd gyhoeddus yn y lleoliad hwnnw ac ni ddylid ei symud at ddefnydd preifat.
Mae cerbydau graeanu Cyngor Wrecsam wedi’u gosod ag offer olrhain sy’n caniatáu i weithrediadau gael eu monitro ac maent yn cofnodi pryd a ble mae halen wedi’i wasgaru.
Yn ystod tywydd garw, gellir sefydlu ystafell reoli bwrpasol hefyd i gydlynu’r ymateb, gyda thimau yn gallu galw ar adnoddau ychwanegol pan fo angen.
Mae gwaith yn parhau i optimeiddio llwybrau graeanu hefyd, gan helpu i leihau teithiau ac allyriadau carbon diangen gan y cerbydau, wrth gynnal safonau gwasanaethau’r gaeaf.
Dywedodd y Cynghorydd David A Bithell, yr Aelod Arweiniol dros yr Amgylchedd, “Mae cryn dipyn o waith yn digwydd y tu ôl i’r llenni i wneud yn siŵr ein bod yn barod ar gyfer y gaeaf.
Mae ein timau yn monitro rhagolygon yn agos trwy gydol y tymor, yn cynnal ein stociau halen ac offer, ac maent yn barod i ymateb pan fydd y tymheredd yn gostwng neu eira a rhew yn cael eu rhagweld.
Mae’n rhaid i ni flaenoriaethu’r llwybrau sy’n cael y mwyaf o draffig ac sy’n darparu mynediad at wasanaethau pwysig, ond yn ystod amodau mwy difrifol, bydd ein timau yn parhau i weithio ar hyd y rhwydwaith fel y mae adnoddau’n caniatáu. Hoffwn ddiolch i bawb sy’n ymwneud â gwasanaeth cynnal a chadw’r gaeaf am y gwaith maent yn ei wneud i helpu i gadw Wrecsam i symud yn ddiogel.”
