Mae prosiect i gefnogi draenogod ledled Wrecsam wedi cael ei ganmol fel llwyddiant ysgubol ar ôl i fwy na 1000 o gartrefi draenogod gael eu creu gan breswylwyr, ysgolion a phartneriaid cymunedol.
Anogodd y Prosiect Adfer Draenogod, dan arweiniad y tîm Lleoedd Lleol ar gyfer Natur, bobl i osod tai draenogod yn eu gerddi trwy roi cartrefi draenogod am ddim.
Anogwyd pobl hefyd i greu “priffyrdd draenogod” mewn ffensys, gan helpu’r rhywogaeth boblogaidd i symud yn ddiogel rhwng mannau gwyrdd, rhoddwyd bwyd a llestri draenogod hefyd am ddim fel rhan o’r pecyn hwn.
Yn wreiddiol, roedd y prosiect yn bwriadu gosod 100 o gartrefi a phriffyrdd draenogod ar draws Wrecsam, ond mae’r ymateb gan y gymuned wedi rhagori ar y disgwyliadau o lawer.
Cofrestrodd dros 80 o bobl hefyd i fod yn llysgenhadon draenogod, gan helpu i godi ymwybyddiaeth, cefnogi cynefinoedd lleol ac annog eraill i weithredu dros ddraenogod.
Mae draenogod yn wynebu nifer o fygythiadau, gan gynnwys colli cynefinoedd, a gall darparu lleoedd diogel iddynt orffwys, bridio a gaeafgysgu wneud gwahaniaeth gwirioneddol.
Roedd y prosiect hefyd yn cynnwys 5 digwyddiad a 13 sesiwn ysgol, gan helpu preswylwyr a phobl ifanc i ddysgu mwy am ddraenogod a’r camau syml y gallant eu cymryd i’w cefnogi.
Dywedodd y Cynghorydd David A Bithell, Aelod Arweiniol dros yr Amgylchedd, “Mae’r ymateb cadarnhaol i’r prosiect hwn wedi bod yn ysgubol, diolch yn fawr iawn i bawb a osododd dŷ draenogod, a greodd briffordd draenogod neu a helpodd i roi’r gair ar led.”
“Diolch i gefnogaeth preswylwyr, ysgolion, llysgenhadon a sefydliadau partner, mae mwy na 1000 o gartrefi draenogod wedi’u creu ledled Wrecsam.”
Dymuna’r tîm Lleoedd Lleol ar gyfer Natur hefyd ddiolch i bartneriaid y prosiect, gan gynnwys Jackson’s Animal Rescue, Sŵ Caer, Ymddiriedolaeth Natur Swydd Amwythig, yr RSPB, y tîm Benthyca a Thrwsio ac Andrew Ruscoe a Keith Sinclair, a gefnogodd y prosiect drwy ddigwyddiadau, sesiynau ysgol, cyflenwadau a mannau casglu.
Gall preswylwyr barhau i helpu draenogod trwy adael bylchau bach mewn ffensys, osgoi defnyddio cemegau a phlaladdwyr, edrych mewn glaswellt hir cyn ei dorri, darparu mannau diogel, cysgodol mewn gerddi a gadael rhan hir neu ‘anhrefnus’ o’u gardd ar gyfer draenogod a bywyd gwyllt.
Am fwy o wybodaeth am Leoedd Lleol ar gyfer Natur yn Wrecsam, cysylltwch â localplacesfornature@wrexham.gov.uk
