Ym mis Mehefin, mae Partneriaeth Coedwig Wrecsam yn gwahodd pobl o bob oed i gymryd rhan yn Wythnos Cysylltiadau Coetir 2025.
Yn dychwelyd am y drydedd flwyddyn, bydd rhaglen fywiog o ddigwyddiadau i ymuno â hi – i ddathlu hud coetiroedd o’n cwmpas, wedi’i hariannu gan Gronfa Goed Frys Coed Cadw.
Yn rhedeg o ddydd Sadwrn 14 hyd at ddydd Gwener 20 Mehefin, thema eleni yw ‘Gwreiddiau a’r Cyfan’, sy’n dathlu pob rhan o goeden – o’r rhwydweithiau tanddaearol o wreiddiau i ganopi copaon coed. Byddwn yn edrych ar sut mae coed yn gweithio, yn ogystal â sut rydyn ni’n elwa arnynt fel bodau dynol!
Diwrnod lansio yng nghanol y ddinas
Mae’r wythnos yn dechrau gyda digwyddiad lansio llawn hwyl, ‘Coed yn Meddiannu’r Ddinas’ ddydd Sadwrn 14 Mehefin, ar lawnt Llwyn Isaf (y Cae Llyfrgell) yng nghanol dinas Wrecsam.
- Cofrestru -
Byddwch chi’n gallu cwrdd â’r arbenigwyr o sefydliadau cefnogi (megis Coed Cadw, Llais y Goedwig, Xplore, Tŷ Pawb ac Ystafell Ddosbarth Coetir), a darganfod pam rydyn ni’n caru coed cymaint.
Dewch draw am weithgareddau am ddim
Gall teuluoedd, cariadon natur a meddyliau chwilfrydig fwynhau rhaglen gyfoethog o weithgareddau am ddim ar Lwyn Isaf rhwng 1 a 4pm gan gynnwys:
- Coginio ar dân coed
- Llwybr stori rhyngweithiol
- Arbrofion gwyddoniaeth ymarferol
- Gweithdai gwehyddu helyg a chrefft coed
- Teithiau tywys natur
- Gweithgareddau celf coetir creadigol
- Profiadau synhwyraidd fel y synau y mae coed yn eu gwneud ac arogleuon y goedwig
Mae pob gweithgaredd wedi’i gynllunio i gysylltu pobl â byd rhyfeddol coed – gan ddatgelu sut maen nhw’n tyfu, cyfathrebu a chefnogi ecosystemau.
“Mae Gwreiddiau a’r Cyfan yn ymwneud â chloddio’n ddwfn – yn llythrennol ac yn ffigurol – i archwilio pob rhan o’r hyn sy’n gwneud coed mor hanfodol i’n byd,” meddai Jacinta Challinor, Cadeirydd Partneriaeth Coedwig Wrecsam. “P’un a yw’n darganfod arogl coedwig pinwydd neu glywed y dirgryniadau mewn coeden, rydyn ni eisiau i bobl gysylltu â choetiroedd mewn ffyrdd hollol newydd.”
Gweddill yr wythnos
Bydd y dathliad yn parhau drwy gydol yr wythnos gyda digwyddiadau cymunedol ledled y rhanbarth.
P’un a ydych eisoes yn frwdfrydig am goed neu’n chwilio am ffordd hwyliog ac ystyrlon o ymgysylltu â natur, mae gan Wythnos Cysylltiadau Coetir rywbeth at ddant pawb.
Llofnodi’r addewid
Os na allwch ymuno ag unrhyw un o’r digwyddiadau yn ystod yr wythnos, mae mwy nag un ffordd o ddangos eich cefnogaeth tuag at goed a choetiroedd yn Wrecsam.
Drwy gofrestru i’r Addewid Coetir gallwch ymuno â’n rhestr bostio, lle gallwch ddarganfod sut i gymryd rhan mewn gwarchod coetir presennol, neu blannu coed newydd, yn Wrecsam.
Rhagor o wybodaeth
I gael rhagor o ddiweddariadau, dilynwch: Partneriaeth Coedwig Wrecsam ar Facebook.
Efallai yr hoffech hefyd ddarllen: Gwaith i ddiogelu mannau gwyrdd Wrecsam yn cael ei gydnabod yn Ngarddwest y Palas
