Erthygl gwadd – Tir Gwyllt
Mae’n bleser gan Tir Gwyllt gyhoeddi lansiad dau brosiect newydd arwyddocaol a fydd yn gwella cynefinoedd bywyd gwyllt, yn cefnogi llesiant cymunedol, ac yn gwneud gwirfoddoli ym maes cadwraeth yn fwy hygyrch ym mhob rhan o ogledd-ddwyrain Cymru.
Bydd y rhaglenni ar waith rhwng y gwanwyn 2026 a 2028, ac yn cael eu cynnal yng ngwarchodfeydd natur Tir Gwyllt yn Wrecsam, Sir y Fflint a Sir Ddinbych. Mae’r gwarchodfeydd yn gartref i rywogaethau pwysig gan gynnwys madfallod dŵr cribog, moch daear, ac ystlumod, ac maent wedi’u lleoli yng nghanol cymunedau preswyl neu’n agos iawn atynt, gan roi cyfle i bobl ddarganfod bywyd gwyllt ar garreg eu drws.
Prosiect Cadwraeth a Chymunedau
Diolch i gefnogaeth gan y Moondance Foundation, bydd Tir Gwyllt yn cyflwyno prosiect Cadwraeth a Chymunedau sy’n canolbwyntio ar wella cynefinoedd, meithrin sgiliau lleol, a chryfhau’r cysylltiad rhwng pobl â natur. Bydd y prosiect yn cynnwys:
- Sesiynau gwirfoddoli wythnosol ledled y tair sir
- Digwyddiadau i gysylltu’r gymuned â natur
- Sesiynau addysg sy’n gysylltiedig â’r cwricwlwm i ysgolion cynradd
Bydd y gweithgareddau hyn yn helpu i gryfhau cynefinoedd ar gyfer y dyfodol tra’n helpu plant ac oedolion i ddysgu am rywogaethau a warchodir, pwysigrwydd amgylcheddau natur o ansawdd uchel, a sut mae ymdrechion cadwraeth lleol yn gysylltiedig â mynd i’r afael â heriau hinsawdd ehangach.
Prosiect Gwirfoddoli â Chymorth
Yn ogystal â hyn, mae Tir Gwyllt yn lansio prosiect Gwirfoddoli â Chymorth newydd er mwyn gwneud gwirfoddoli ym maes cadwraeth yn fwy hygyrch i bobl y gall fod angen cymorth ychwanegol arnynt i gymryd rhan. Ariennir y prosiect gan gynllun Grant Gwirfoddoli Cymru, a reolir gan CGGC, ac mae wedi’i anelu at unigolion niwroamrywiol neu bobl sy’n byw gyda heriau fel gorbryder, iselder, diffyg hyder, neu ynysu cymdeithasol.
Bydd y rhai sy’n cymryd rhan yn derbyn cymorth un-i-un wedi’i deilwra i’w helpu i symud ymlaen o’r cam ymsefydlu cychwynnol i gymryd rhan yn llawn mewn sesiynau gwirfoddoli i grwpiau yng ngwarchodfeydd Tir Gwyllt. Bydd cyfle i’r gwirfoddolwyr gymryd rhan mewn amrywiaeth eang o weithgareddau, gan gynnwys:
- Rheoli coetiroedd a gwlyptiroedd
- Creu cynefinoedd a chartrefi i fywyd gwyllt
- Cymryd rhan mewn arolygon bywyd gwyllt
- Helpu i gynnal mannau gwyrdd fel y gall y gymuned eu mwynhau
Nod y sesiynau hyn yw meithrin hyder, cefnogi cysylltiad cymdeithasol, a helpu gwirfoddolwyr i gyflawni nodau personol drwy gymryd rhan mewn ffordd ystyrlon yn y maes cadwraeth natur.
Gyda’i gilydd, mae’r ddau brosiect hyn yn fuddsoddiad sylweddol yn yr amgylchedd naturiol a llesiant cymunedau ym mhob rhan o ogledd-ddwyrain Cymru. Trwy wella cynefinoedd, creu cyfleoedd newydd i gysylltu â natur, a chael gwared ar y rhwystrau sy’n atal pobl rhag cymryd rhan, nod Tir Gwyllt yw sicrhau buddion tymor hir i bobl a bywyd gwyllt.
Awydd cymryd rhan? Mae rhagor o wybodaeth ar wefan Tir Gwyllt neu cysylltwch â Tir Gwyllt ar 01978 757524 neu info@wild-ground.org.uk
