Mae Cyngor Wrecsam a Home Start Wrecsam yn dathlu llwyddiant prosiect Banc Offer Babanod, a gefnogodd 83 o deuluoedd dros gyfnod o flwyddyn.
Mae’r prosiect Banc Offer Babanod, a ddarperir gan Home Start Wrecsam, yn casglu offer babanod o ansawdd uchel a’i ailddosbarthu i deuluoedd ledled Wrecsam trwy system atgyfeirio.
Gyda chyllid gan Gronfa Economi Gylchol Llywodraeth Cymru rhwng 2024 a 2025, a gyda chefnogaeth Cyngor Wrecsam, llwyddodd y prosiect i helpu mwy o bobl gyda mwy o eitemau, a chyrraedd ardal ehangach.
Rhoddodd y prosiect gefnogaeth hanfodol i deuluoedd lleol wrth hyrwyddo cynaliadwyedd a lleihau gwastraff, gan ddangos pŵer partneriaeth rhwng llywodraeth leol a’r sector gwirfoddol.
Roedd y cyflawniadau allweddol yn ystod 2024-25 yn cynnwys:
- Dros 1,983kg o eitemau babanod wedi’u dargyfeirio o safleoedd tirlenwi
- 83 o deuluoedd yn cael eu cefnogi gyda mwy na 188 o eitemau unigol
- Sefydlu sawl pwynt casglu yn y gymuned, gan leihau allyriadau cyflenwi
- Recriwtio a hyfforddi naw gwirfoddolwr newydd, gan gryfhau cynaliadwyedd hirdymor
- Ymgysylltu â busnesau lleol ac elusennau ar gyfer partneriaethau storio a rhoddion
Dywedodd y Cynghorydd David A Bithell, Dirprwy Arweinydd a Hyrwyddwr Hinsawdd: “Yn ystod y flwyddyn fe wnaeth y Banc Offer Babanod wirioneddol gael effaith barhaol trwy gefnogi’r gymuned leol, lleihau gwastraff a lleihau allyriadau carbon. Diolch yn fawr i bawb sy’n cymryd rhan.”
Dywedodd y Cynghorydd Beverley Parry-Jones, Hyrwyddwr Gwrth-Dlodi: “Daeth prosiect Band Offer Babanod ag offer babanod o ansawdd uchel i 83 o deuluoedd sydd angen cymorth ychwanegol yn ystod cyfnod o gostau byw cynyddol, sy’n hynod ganmoladwy. Da iawn bawb!”
Home Start Wrecsam
Mae Home Start Wrecsam yn fudiad gwirfoddol hirsefydlog sy’n cefnogi teuluoedd drwy feichiogrwydd a phlentyndod cynnar.
Mae’r tîm yn parhau i gyflawni prosiect Banc Offer Babanod gyda phrosesau a phartneriaethau newydd ar waith nawr y cyfnod o gyllid yr Economi Gylchol wedi dod i ben.
Dywedodd Pam Hoyle, Cyfarwyddwr Home-Start: “Mae’r prosiect Banc Offer Babanod yn cefnogi nod Home Start i roi sicrwydd i rieni nad oes angen pethau newydd disglair ar fabanod a phlant, mae angen perthnasoedd cariadus a meithrin arnynt.
“Mae’r cyllid wedi ein galluogi i recriwtio a hyfforddi tîm gwych o wirfoddolwyr. Mae’r gwirfoddolwyr hynny bellach yn arwain hyn a gallant gyfeirio teuluoedd at ffynonellau eraill o gymorth pan fo angen i wneud yn siŵr bod Home Start yn cyrraedd rhieni pan fydd ein hangen arnyn nhw fwyaf.”
Drwy gydol ei gyflawni, roedd y prosiect yn cyd-fynd â nodau Deddf Llesiant Cenedlaethau’r Dyfodol (Cymru) 2015, gan gefnogi amcanion fel ‘Cymru Fwy Cyfartal’, ‘Cymru Gydnerth’, a ‘Cymru sy’n Gyfrifol yn Fyd-eang’.
Ewch i wefan Home Start Wrecsam i ddysgu mwy am y Banc Offer Babanod.
Siop gwisgoedd ysgol ail-law am ddim yn agor yn yr Hwb Lles – Newyddion Cyngor Wrecsam
Derbyniwch y newyddion a’r wybodaeth ddiweddaraf yn syth i’ch mewnflwch.
