Mae “Fix it Feb” Caffi Trwsio Cymru yn ôl, gyda’r ymgyrch yn hyrwyddo cynaliadwyedd trwy annog pobl i atgyweirio yn hytrach na phrynu eitemau newydd.
Ym mis Chwefror eleni, mae trigolion Wrecsam yn cael eu gwahodd i addo trwsio o leiaf un eitem sydd wedi torri– gan arbed arian, lleihau gwastraff, a chefnogi cynaliadwyedd yn lleol.
Gallai addewidion gynnwys gwnïo botwm, clytio dillad, neu adfer un o’ch hoff eitemau. Os ydych yn teimlo nad yw eich sgiliau trwsio yn ddigon da, peidiwch â phoeni!
Bydd Caffi Trwsio Wrecsam yn cynnal ei ddigwyddiad nesaf ddydd Sadwrn, Mawrth 14, 11am-1pm yng Nghanolfan Parc Caia, Prince Charles Road, LL13 8TH.
Galwch heibio gyda’ch eitem sydd wedi torri neu wedi’i difrodi, a bydd y trwswyr gwirfoddol yn ceisio ei hatgyweirio am ddim.
Gallwch hefyd weld dyddiadau digwyddiadau yn y dyfodol ar wefan Caffi Trwsio Cymru, neu dudalen Facebook Caffi Trwsio Wrecsam y gallwch ei dilyn hefyd ar gyfer y diweddariadau.
Dywedodd y Cynghorydd David A Bithell, Dirprwy Arweinydd a Hyrwyddwr Hinsawdd: “Rydym yn annog ein trigolion i leihau eu hôl troed carbon trwy gefnogi’r ymgyrch ‘Fix it Feb’. Diolch i waith gwych y caffis trwsio, gall pobl gadw eu heitemau am gyfnod hwy ac arbed arian ar yr un pryd.”
Dywedodd y Cynghorydd Terry Evans, yr Aelod Arweiniol dros yr Amgylchedd: “Os oes gennych eitem sydd angen ei thrwsio, dewch â hi i’r caffi trwsio nesaf. Mae trwsio rhywbeth yn llawer gwell i’r amgylchedd na phrynu rhywbeth newydd, gan ei fod yn atal gwastraff diangen.”
Ymunwch â’r Mudiad! Rhowch eich cefnogaeth i “Fix It Feb” gan ymweld â gwefan Caffi Trwsio Cymru. Gwnewch eich addewid heddiw a byddwch yn rhan o’r mudiad ar gyfer Cymru fwy cynaliadwy a di-wastraff.
Benthyca a Thrwsio – pam prynu pan allwch chi fenthyg?
Gyda Benthyca a Thrwsio yn Nhŷ Pawb, gallwch gael gafael ar yr hyn sydd ei angen arnoch heb wario gormod. Mae’n ffordd gost-effeithiol ac ecogyfeillgar o gael yr eitemau sydd eu hangen arnoch, yn union pryd y mae eu hangen arnoch.
O beiriannau gwnïo i offer gwersylla, tŵls i gyflenwadau parti, mae yna ddigon o eitemau defnyddiol y gallwch eu llogi am gost fach (o’i gymharu â’r hyn y byddech chi’n ei dalu i brynu’r eitem newydd eich hun).
Gall fod yn ateb gwych os mai dim ond am gyfnod byr y mae angen i chi ddefnyddio rhywbeth. Mae’r cynllun benthyca a dychwelyd yn helpu i leihau gwastraff diangen ac yn osgoi gorfod talu pris llawn am rywbeth na fydd ei angen arnoch yn aml iawn.
