Mae galwadau ar Lywodraeth Cymru i gefnogi cynigion ar gyfer gwasanaethau rheilffordd uniongyrchol newydd rhwng Wrecsam a Llundain Euston.
Mae’r Cynghorydd David A Bithell, yr Aelod Arweiniol dros yr Amgylchedd sy’n gyfrifol am drafnidiaeth strategol, wedi ysgrifennu at y Dirprwy Weinidog Trafnidiaeth i dynnu sylw at bwysigrwydd gwasanaethau arfaethedig Rheilffordd Wrecsam, Swydd Amwythig a Chanolbarth Lloegr.
Pe bai’r cynigion yn cael eu gwireddu, byddai hyd at bum trên y dydd yn gweithredu o Wrecsam i Lundain Euston drwy’r Amwythig, gan helpu i wella cysylltiadau rheilffordd uniongyrchol rhwng Gogledd Cymru, Canolbarth Lloegr a Llundain.
Yn gynharach eleni, teithiodd ASau lleol a phartneriaid o awdurdodau lleol i 10 Stryd Downing i gyflwyno deiseb yn galw am y gwasanaethau rheilffordd uniongyrchol newydd. Mae cefnogaeth wleidyddol barhaus i’r cynigion wrth i gais Rheilffordd Wrecsam, Swydd Amwythig a Chanolbarth Lloegr fynd rhagddo.
Mae disgwyl i’r gwasanaethau arfaethedig gefnogi twf economaidd ehangach yn Wrecsam a gallent hefyd greu hyd at hanner cant o swyddi newydd.
Dywedodd y Cynghorydd David A Bithell, “Mae gwella cysylltedd rheilffyrdd rhwng Wrecsam a Llundain yn hynod bwysig i’n dinas a’r rhanbarth ehangach.”
“Byddai’r gwasanaethau arfaethedig hyn yn darparu gwell cysylltiadau uniongyrchol â’r brifddinas, yn cefnogi busnesau lleol, yn cryfhau twf economaidd ac yn creu swyddi newydd.”
“Rydw i’n gofyn i Lywodraeth Cymru gefnogi Rheilffordd Wrecsam, Swydd Amwythig a Chanolbarth Lloegr a chymeradwyo’r cynigion hyn wrth i’r cais fynd rhagddo. Mae hwn yn gyfle gwirioneddol i wella cysylltiadau trafnidiaeth ar gyfer Wrecsam a Gogledd Cymru, ac rydw i’n gobeithio y bydd Llywodraeth Cymru yn rhoi ei chefnogaeth lawn iddi.”
Mae disgwyl i’r Swyddfa Rheilffyrdd a Ffyrdd wneud penderfyniad ar y cais ym mis Medi.
