Mae trigolion a defnyddwyr y ffordd yn cael eu hysbysu am waith ffordd arfaethedig sy’n digwydd yn ardal Owrtyn a Bangor Is-Coed dros yr wythnosau nesaf.
Mae’r gwaith yn cynnwys gosod wyneb newydd ar y B5426 Bangor Is-Coed, a elwir yn y Filltir Syth, sydd i fod i gael ei gynnal o ddydd Llun 13 Gorffennaf tan ddydd Mercher 29 Gorffennaf. Yn ystod y cyfnod hwn, bydd y ffordd ar gau, a bydd llwybr gwyriad wedi’i arwyddo ar waith ar hyd yr A528 Ffordd Owrtyn, y B5130 Lôn yr Odyn a’r A525 Ffordd Bangor.
Ar wahân i hynny, mae gwaith hefyd wedi’i gynllunio ar gynllun yr A528 Cinders i Owrtyn, gyda’r ffordd ar gau o ardal Tafarn y Cross Foxes i gyffordd yr A528 Ffordd Sir Amwythig ym mhentref Owrtyn er mwyn cyflawni gwaith adnewyddu mawr ar y prif gyflenwad dŵr. Ar hyn o bryd, mae disgwyl i’r gwaith hwn ddigwydd o ddydd Llun Gorffennaf 20 i ddydd Iau Medi 3.
Er y bydd rhywfaint o orgyffwrdd rhwng y gwaith a’r llwybrau gwyriad cysylltiedig, mae disgwyl i’r effaith gael ei reoli trwy drefniadau rheoli traffig cydgysylltiedig. Mae’r cwmnïau rheoli traffig dan sylw yn ymwybodol o’r cynlluniau cyfagos, a bydd unrhyw adrannau lle mae arwyddion mwy nag un llwybr gwyriad yn cwrdd yn cael eu harwyddo’n glir er mwyn osgoi dryswch.
Gofynnir i ddefnyddwyr y ffordd ddilyn y llwybrau gwyriad swyddogol sydd wedi’u harwyddo, caniatáu amser ychwanegol ar gyfer teithiau ac osgoi defnyddio ffyrdd anaddas fel llwybrau amgen. Mae’r gwyriadau cymeradwy wedi’u hasesu ar gyfer diogelwch, capasiti ac addasrwydd.
Dywedodd y Cynghorydd David A Bithell, yr Aelod Arweiniol dros yr Amgylchedd, “Rydyn ni’n gwerthfawrogi y gall y gwaith hwn darfu ar drigolion, busnesau a defnyddwyr ffyrdd yn ardal Owrtyn a Bangor Is-coed, ac rydyn ni’n ymddiheuro am unrhyw anghyfleustra a fydd yn cael ei achosi.”
“Mae’r cynlluniau hyn yn bwysig i wella seilwaith lleol, gan gynnwys wynebau ffyrdd a rhwydweithiau cyfleustodau, ac mae swyddogion yn gweithio gyda phartneriaid a chontractwyr rheoli traffig i gydlynu’r gwaith a lleihau tarfu lle bynnag y bo modd.”
