Mae bron pob un ohonom yn ailgylchu gartref heb feddwl ddwywaith. Ond mae ymchwil newydd gan Cymru yn Ailgylchu yn dangos y gall pobl yn aml fod yn llai gofalus pan fyddan nhw oddi cartref yn mwynhau gwyliau, diwrnodau allan, atyniadau a digwyddiadau. Y gerddoriaeth. Y bwyd. Yr hwyl. Swnio’n gyfarwydd?
Y newyddion da yw bod cyfleusterau ailgylchu bellach ar gael mewn mwy o leoedd nag erioed o’r blaen ledled Cymru. Oherwydd wedi iti roi eitem yn y bin cywir, mae rhywbeth gwych yn digwydd nesaf.
Dyma ddechrau dy siwrne
Mae pob taith wych yn dechrau yn rhywle. Mae taith dy ailgylchu yn dechrau gydag un dewis syml. Dewis y bin cywir sy’n rhoi’r daith ar waith.
Ac mae’n daith sy’n aros yn rhyfeddol o agos at adref. Mae mwy na 90% o’r ailgylchu a gesglir yng Nghymru yn cael ei brosesu o fewn y Deyrnas Unedig, ac mae mwy na’i hanner yn peidio gadael Cymru o gwbl.
Arhosfan 1: Y tu ôl i’r llenni
Ar ôl eu casglu o’n safle, mae deunyddiau ailgylchadwy yn mynd i gyfleusterau arbenigol lle cânt eu didoli i wahanol ffrydiau deunydd.
Gwydr gyda gwydr. Metel gyda metel. Plastig gyda phlastig. Papur a cherdyn gyda phapur a cherdyn. Mae gwastraff bwyd yn cael ei gasglu ar wahân.
Cadw deunyddiau ar wahân yw’r hyn sy’n gwneud ailgylchu o ansawdd uchel yn bosibl. Dyna pam mae’r weithred syml o ddewis y bin cywir mor bwysig.
Gall potel yn y bin ailgylchu poteli droi’n rhywbeth newydd. Chaiff potel yn y bin anghywir mo’r cyfle.
Metel: Barod am y daith dragwyddol
Mae metel wedi’i ailgylchu’n defnyddio hyd at 95% yn llai o ynni na chynhyrchu metel o ddeunyddiau crai.
Mae deunyddiau metel fel caniau, ffoil ac erosolau’n cael eu didoli, eu toddi a’u hailbrosesu’n nwyddau metel newydd a gellir eu hailgylchu dro ar ôl tro heb i’r ansawdd ddirywio.
Gwydr: Yr encôr tragwyddol
Fel metel, gellir ailgylchu gwydr am byth hefyd.
Mewn cyfleusterau arbenigol, caiff gwydr ei falu, ei lanhau a’i doddi cyn cael ei droi’n boteli a jariau newydd. Eto. Ac eto. Ac eto.
Gallai un botel wedi’i hailgylchu’n gywir ddechrau teithiau newydd dirifedi.
Plastig: Mwy o bŵer nag y byddet ti’n ei feddwl
Ar ôl cael ei ddidoli, caiff plastig ei lanhau, ei rwygo’n fân a’i brosesu i wneud deunydd wedi’i ailgylchu’n barod i’w droi’n ddeunydd pacio a nwyddau newydd.
Gallai’r hyn sy’n dechrau fel potel ddiod fod yn rhywbeth hollol wahanol fory. Ond dim ond os yw’n cyrraedd y bin cywir.
Gwastraff bwyd: Y seren annisgwyl
Oeddech chi’n gwybod y defnyddir eich gwastraff bwyd yn Wrecsam i greu deunydd gwella pridd, sydd ar gael i’n preswylwyr i’w gasglu o’r tair canolfan ailgylchu trwy gydol y flwyddyn?
Felly os nad ydych eisoes yn ailgylchu eich gwastraff bwyd, pam na wnewch chi ddechrau ailgylchu eich sbarion a’i droi yn rhywbeth defnyddiol? Ac yna, pan fyddwch angen gwneud rhywfaint o arddio, gallwch ddod i gasglu rhywfaint o ddeunydd gwella pridd yn rhad ac am ddim. Mae’n swnio fel syniad da, tydi?
Mae gan bopeth ran i’w chwarae, o greiddiau afalau a chrwyn anfwytadwy i fagiau te a phlisgyn wyau.
Dywedodd David A Bithell, Dirprwy Arweinydd ac Aelod Arweiniol dros yr Amgylchedd: “Rydyn ni am ledaenu’r neges ei bod hi’n bwysig ailgylchu popeth y gallwch, bob amser. Mae llawer ohonom wedi arfer ag ailgylchu gartref, ond mae angen i ni gadw at yr un safonau pan fyddwn ni allan yn teithio. Dyna pam rydyn ni’n falch o gefnogi ymgyrch Bydd Wych. Ailgylcha gan Cymru yn Ailgylchu’r haf hwn.”
Anfon dy ddeunyddiau ailgylchadwy yn ôl ar daith pan fyddi di oddi cartref yr haf hwn
Felly p’un a wyt ti’n mwynhau digwyddiadau fel ein un ni, neu allan am y dydd gyda’r teulu, gwna’n siŵr fod dy ddeunyddiau ailgylchadwy yn cyrraedd y bin cywir, lle bynnag y byddi di.
Dysgwch fwy am yr hyn y gellir ei ailgylchu ar ein gwefan.
2 ffordd hawdd o gael gafael ar ein leinin cadi bwyd am ddim – Newyddion Cyngor Wrecsam
