Mae ysgol gynradd yn Wrecsam wedi derbyn adborth rhagorol yn dilyn arolwg gan Estyn.
Disgrifir Ysgol Gynradd Alexandra fel ysgol “ofalgar a chynhwysol” gan arolygwyr, a ymwelodd â’r ysgol ym mis Hydref.
Mae canfyddiadau allweddol yr adroddiad fel a ganlyn:
- Mae staff a disgyblion yn teimlo eu bod yn cael eu gwerthfawrogi ac yn falch o fod yn rhan o gymuned yr ysgol.
- Perthnasoedd cadarnhaol ymhlith disgyblion a staff sy’n creu awyrgylch cyfeillgar a chefnogol lle mae plant yn teimlo eu bod yn cael eu gwerthfawrogi.
- Mae plant yn gwneud cynnydd sylweddol yn ystod eu hamser yn yr ysgol.
- Darperir cefnogaeth ragorol i ddisgyblion gydag anghenion dysgu ychwanegol.
- Mae ffocws cryf ar gynnig cefnogaeth emosiynol sy’n helpu disgyblion i ymddwyn yn well ac ymgysylltu’n llawn mewn gwersi.
- Mae’r ysgol yn hafan ddiogel sy’n ysgogi cyffro ymhlith disgyblion i ddysgu a’u hannog i barchu ei gilydd.
- Mae disgyblion yn siaradwyr hyderus sy’n rhannu eu syniadau’n frwd ac yn mynegi eu hunain yn glir.
- Mae disgyblion yn datblygu sgiliau ysgrifennu da, ac yn fathemategwyr hyderus.
- Mae arweinwyr a llywodraethwyr yn gweithio’n effeithiol ac mae ganddynt weledigaeth glir ac ymrwymiad cryf i gynnal safonau uchel.
- Mae athrawon yn derbyn datblygiad a chefnogaeth broffesiynol bwrpasol, ac mae’r ysgol yn rheoli ei hadnoddau’n dda.
Meddai’r Pennaeth, Lisa Roberts: “Mae hwn yn adroddiad gwych sy’n amlygu’r gwaith caled a’r ymrwymiad a ddangoswyd gan bawb yn yr ysgol.
“Mae’r awyrgylch dysgu yn Ysgol Alexandra’n hyfryd ac mae’n fraint o’r mwyaf gweld ein plant yn tyfu a datblygu yn ystod eu hamser gyda ni.
“Rydym yn hynod o ffodus i gael staff, rhieni a llywodraethwyr sydd eisiau’r gorau ar gyfer ein disgyblion, ac rydym yn gweithio’n galed fel tîm i sicrhau fod yr ysgol yn lle gwobrwyol a hyfryd.”
Dywedodd y Cyng. Phil Wynn, Aelod Arweiniol Addysg yng Nghyngor Wrecsam: “Mae’r adroddiad hwn yn rhagorol ac yn enghraifft arall o sut mae ysgolion cynradd Wrecsam yn helpu i siapio bywydau ifanc a chefnogi plant yn ystod blynyddoedd pwysicaf eu haddysg.
“Hoffwn ddiolch i’r Pennaeth, Lisa Roberts a phawb arall yn Ysgol Alexandra am eu gwaith caled a’u hymrwymiad. Mae’n ysgol ragorol ac yn gredyd i Wrecsam.”
Gallwch ddarllen yr adroddiad llawn ar wefan Estyn.
Derbyniwch y newyddion a’r wybodaeth ddiweddaraf yn syth i’ch mewnflwch.
