Unwaith eto, byddwn yn cefnogi’r Llynges Fasnachol ddydd Mercher 3 Medi trwy chwifio’r Lluman Coch i anrhydeddu’r dynion a’r menywod dewr sydd wedi gwasanaethu yn ystod y ddau ryfel byd, ac sy’n parhau i wasanaethu, i sicrhau bod gennym gyflenwadau i gadw ein cenedl â’i phen uwchben y dŵr.
Fel “cenedl sydd yn ynys” mae’r DU yn dibynnu ar forwyr y Llynges Fasnachol am 95% o’n mewnforion, gan gynnwys hanner y bwyd rydyn ni’n ei fwyta. Y DU sydd â’r diwydiant porthladdoedd mwyaf yn Ewrop. Mae 75% o’n hallforion (yn ôl cyfaint) yn cael eu cludo o borthladdoedd y DU.
Pam mae Diwrnod y Llynges Fasnachol ar y 3 Medi?
Dioddefodd y gwasanaeth ddamwain gyntaf yr ail ryfel byd pan gafodd yr S.S. Athenia, llong fasnachol, ei tharo â thorpido gan golli 128 o deithwyr a chriw ychydig oriau ar ôl i ryfel gael ei ddatgan. Ers hynny, mae 3 Medi wedi cael ei gydnabod fel Diwrnod y Llynges Fasnachol.
Yn anffodus, colledion o suddo’r Athenia oedd y cyntaf gyda channoedd o longau a miloedd o forwyr yn wynebu’r un tynged yn y blynyddoedd i ddod.
Dywedodd y Cynghorydd Beverley Parry Jones, Pencampwr y Lluoedd Arfog, “Mae llawer yn Wrecsam wedi gwasanaethu neu’n dal i wasanaethu yn y Llynges Fasnachol. “Bydd eu hymroddiad anhygoel a’u gwasanaeth ffyddlon yn cael eu cydnabod yn falch trwy chwifio’r Lluman Coch. “Gan ein bod yn nodi 80 mlynedd ers Diwrnod Buddugoliaeth yn Ewrop a Diwrnod VJ eleni, bydd hyn hefyd yn ein hatgoffa o’r cyfraniad sylweddol a wnaed gan y Llynges Fasnachol ym Môr yr Iwerydd a’r Môr Tawel
Dywedodd Maer Wrecsam, y Cynghorydd Tina Mannering, “Mae’n fraint chwifio’r Lluman Coch uwchben Neuadd y Dref i dalu teyrnged i’r Llynges Fasnachol a dweud diolch am eu gwasanaeth i fywydau unigolion ledled y DU yn ogystal ag yma yn Wrecsam.”
Seremoni Chwifio’r Lluman Coch yn Neuadd y Dref
Ar ddydd Mercher 3 Medi, byddwn yn cynnal seremoni fer i godi’r faner y tu allan i brif fynedfa Neuadd y Dref am 10.30 a.m. Mae croeso i bawb fynychu.
