Mae dau gynllun grant gwerth miliynau o bunnoedd yn cael eu lansio yn Sir y Fflint a Wrecsam heddiw – gan roi hwb i gyfnod newydd cyffrous ar gyfer gweithgynhyrchu datblygedig yn y rhanbarth.
Wedi’u hanelu at fentrau bach a chanolig (BBaChau), mae’r cynlluniau wedi’u creu i gynyddu twf busnesau. Maent yn rhan o Barth Buddsoddi newydd Sir y Fflint a Wrecsam, sy’n cael ei gefnogi gan lywodraethau’r DU a Chymru, a’i gydlynu gan Uchelgais Gogledd Cymru.
Bydd cynlluniau Cyngor Sir y Fflint a Chyngor Wrecsam yn cynnig grantiau o £5k hyd at £100k (o leiaf 30% wedi’i ariannu gan bob cwmni) i gwmnïau gweithgynhyrchu lleol yn eu hardal awdurdod lleol.
Bydd busnesau’n gallu gwneud cais o ddydd Llun, Chwefror 2 a byddant yn gallu defnyddio’r arian ar gyfer:
- Prynu offer cyfalaf i wella galluoedd gweithgynhyrchu.
- Achredu ac ardystio i wella cyfleoedd cadwyn gyflenwi, gwell trosiant a thwf.
- Addasiadau eiddo ac addasiadau safle gwyrdd i ganiatáu i fusnesau drosglwyddo i weithrediadau mwy cynaliadwy.
Gyda’i gilydd, bydd y cynlluniau yn dyrannu £6m mewn grantiau dros y tair blynedd nesaf.
Dywedodd y Cynghorydd Dave Hughes, Arweinydd Cyngor Sir y Fflint: “Mae’r Parth Buddsoddi yn gam hynod gadarnhaol i Sir y Fflint a Wrecsam, a bydd yn rhoi llwyfan i ni ddenu buddsoddiad newydd i’r rhanbarth – gan helpu i greu swyddi ac ysbrydoli’r genhedlaeth nesaf o arweinwyr busnesau a gweithwyr medrus.
“Mae lansio’r grantiau hyn yn dangos y math o gyfleoedd y bydd y Parth Buddsoddi yn eu cyflwyno, ac rwy’n gobeithio y bydd cymaint o fusnesau lleol â phosibl yn gwneud cais.”
Dywedodd y Cynghorydd Mark Pritchard, Arweinydd Cyngor Wrecsam, a Chadeirydd Uchelgais Gogledd Cymru: “Mae’r sector gweithgynhyrchu datblygedig yn hanfodol i’n heconomi, ac mae llawer o weithgynhyrchwyr o’r radd flaenaf eisoes wedi’u lleoli yma.
“Mae angen i ni nawr adeiladu ar hyn a dangos ein bod yn bwerdy gwirioneddol ar gyfer uwch-ddiwydiannau yng Nghymru, ac rwy’n gobeithio y bydd cwmnïau lleol yn manteisio ar y grantiau hyn. Mae hwn yn gyfle euraidd i’r sector.”
Mae busnesau bach a chanolig yn cael eu diffinio fel busnesau sydd â llai na 250 o weithwyr ac er bod y rhanbarth yn gartref i nifer o gwmnïau byd-eang mawr, mae busnesau bach a chanolig yn cyfrif am 97.4% o’r holl fusnesau yn Sir y Fflint a Wrecsam.
O ganlyniad, mae busnesau bach a chanolig yn cael eu hystyried yn hanfodol i dwf y sector gweithgynhyrchu datblygedig yng Ngogledd-ddwyrain Cymru.
Rhagor o wybodaeth…
I gael rhagor o wybodaeth am gynllun Sir y Fflint, ewch i wefan Cyngor Sir y Fflint.
I gael rhagor o wybodaeth am gynllun Wrecsam, ewch i wefan Cyngor Wrecsam.
