Mae’n siŵr y bydd y mwyafrif ohonoch yn gwybod bod gennym dair canolfan ailgylchu gwastraff y cartref yn Wrecsam, ond ydych chi’n defnyddio’r cyfleusterau hyn cymaint ag y gallech?
Cofiwch y gall trigolion Wrecsam ddefnyddio’r tair canolfan AM DDIM, ac maen nhw ar agor saith diwrnod yr wythnos.
Meddai’r Cyng. David A. Bithell, Aelod Arweiniol yr Amgylchedd a Chludiant: “Os ydych yn clirio’r tŷ neu os oes gennych fwy na’r arfer o wastraff a deunyddiau ailgylchu i gael gwared arnynt, gallwch gynllunio i ymweld ag un o’r tri safle. Gall trigolion Wrecsam ddefnyddio’r safleoedd yn rhad ac am ddim, a thrwy wneud hynny byddwch yn ein galluogi i ailgylchu eich deunyddiau’n gywir. Mae cynorthwywyr ar gael yn y canolfannau i’ch cynghori a’ch cyfeirio i’r pwyntiau cywir os ydych yn ansicr ble i roi eich gwahanol eitemau.”
Oriau Agor
Lôn y Bryn, Ystâd Ddiwydiannol Wrecsam LL13 9UT
- Cofrestru -
• 8am – 8pm drwy gydol y flwyddyn
Y Lodge, Brymbo, Wrecsam LL11 5NR
• Mis Mawrth 9am – 6pm
• Mis Ebrill tan Awst 9am – 8pm
• Mis Medi 9am – 6pm
• Mis Hydref tan Chwefror 9am – 4pm
Banc Wynnstay, Plas Madoc, Wrecsam LL14 3ES
• Mis Mawrth 9am – 6pm
• Mis Ebrill tan Awst 9am – 8pm
• Mis Medi 9am – 6pm
• Mis Hydref tan Chwefror 9am – 4pm
Dewch i weithio ym maes gofal cymdeithasol, er mwyn eich cymuned.
Beth allwch chi ei ailgylchu?
Fe fyddwch yn siŵr o fod yn gwybod y gallwch ddod â phethau fel papur, gwydr, pren, gwastraff gardd ac eitemau trydanol i’r canolfannau ailgylchu i’w hailgylchu – y pethau arferol – ond mae llawer mwy na hyn mewn gwirionedd.
Edrychwch ar wefan wrecsam.gov.uk/service/ffyrdd-eraill-o-ailgylchu-yn-wrecsam/canolfan-ailgylchu-gwastraff-y-cartref a chliciwch ar ‘eitemau ychwanegol y gallwch eu hailgylchu’ am restr lawn.
Ychydig o’r eitemau ar y rhestr gynhwysfawr hon yw batris car, olew coginio a matresi i enwi dim ond rhai.
Ni chaniateir deunyddiau y gellir eu hailgylchu yn y sgip gwastraff cyffredinol
Os ydych yn dod ag unrhyw fagiau i’w rhoi yn y sgipiau gwastraff cyffredinol yn y canolfannau ailgylchu, gofalwch nad oes unrhyw ddeunyddiau ailgylchadwy ynddyn nhw.
Oherwydd mesurau diogelwch, ni all ein gweithwyr agor y bagiau i weld a oes deunyddiau ailgylchadwy ynddynt, felly rydym yn dibynnu arnoch chi i sicrhau nad yw’r bagiau yn cynnwys unrhyw beth a all gael ei ailgylchu.
Gwnewch yn siŵr eich bod yn tynnu allan unrhyw boteli, caniau ac ati sydd wedi eu rhoi yn y bagiau mewn camgymeriad, a’u rhoi yn eich biniau ailgylchu wrth ymyl y ffordd neu yn y banciau ailgylchu priodol yn y ganolfan ailgylchu.
Cynlluniwch eich ymweliad – mae’n arbed amser
Mae cynllunio’ch ymweliad yn ffordd dda o arbed amser.
Yn syml, os ydych yn cyrraedd gyda’ch deunyddiau heb eu didoli, byddwch yn treulio mwy o amser ar y safle.
Os ydych chi wedi didoli eich deunyddiau ymlaen llaw, byddant yn barod i’w rhoi yn y baeau cywir yn syth. Os ydych yn ansicr ble mae unrhyw eitemau yn mynd, dylech eu rhoi i un ochr ac ar ôl cyrraedd y safle gall y cynorthwywyr ddweud wrthych ble y dylech eu rhoi.
Mae’r broses yn rhedeg yn fwy esmwyth os yw pawb yn gwneud hyn.
Peidiwch â chymryd rhan mewn tipio anghyfreithlon
Trwy fynd â’ch gwastraff i’r safleoedd byddwch yn ein helpu gyda’n cyfraddau ailgylchu, hefyd byddwch osgoi bod yn rhan o unrhyw droseddau tipio anghyfreithlon yn ddiarwybod gan wasanaethau sy’n cynnig gwaith clirio tai am brisiau gostyngedig.
Mae nifer o achlysuron lle mae trigolion wedi talu i rywun waredu eu sbwriel, heb sylweddoli eu bod mewn gwirionedd yn cymryd eu harian a gwaredu’r sbwriel lle bynnag y gallant. Gallai hyn eich gwneud yn atebol os oes modd olrhain y sbwriel yn ôl atoch chi.
Ychwanegodd y Cynghorydd Bithell: “Ni ellir esgusodi pobl sy’n tipio’n anghyfreithlon. Os ydych chi’n talu i rywun gasglu eich gwastraff, gofalwch eich bod yn defnyddio cwmni gydag enw da i wneud hynny ar eich rhan. Ni ddylai unrhyw un sy’n derbyn arian parod i fynd â’ch gwastraff fod yn defnyddio canolfannau ailgylchu a bydd angen iddyn nhw waredu’r gwastraff mewn cyfleuster trwyddedig preifat. Yn anffodus rydym yn gweld sawl achos o wastraff yn cael ei dipio’n anghyfreithlon. Felly, os ydych yn talu i rywun waredu eich sbwriel, gofalwch eu bod yn ddilys.”
Unrhyw beth i’w ailddefnyddio?
Mae’r siop ailddefnyddio a redir gan Hosbis Tŷ’r Eos wedi’i lleoli ar safle canolfan ailgylchu Lôn y Bryn. Yma gallwch brynu eitemau o safon sydd wedi cael eu hailgylchu. Mae ystod eang o stoc ar gael yn y siop bob amser ac maent yn cynnig gwerth gwych am arian. Byddem yn annog pawb i fynd yno i weld dros eu hunain.
Gallwch hefyd gyfrannu eitemau a allai gael eu hailwerthu yn y siop trwy fynd â nhw i unrhyw un o’n tair canolfan ailgylchu a fydd yn eu pasio ymlaen i’r siop ailddefnyddio. Ydych chi’n ansicr ble i fynd â rhoddion? Siaradwch gydag un o’n cynorthwywyr a fydd yn gallu eich rhoi ar ben ffordd.
Rheolau’r canolfannau ailgylchu
I atgoffa’ch hunain beth yw’r rheolau presennol yn y canolfannau ailgylchu, edrychwch yma.
DOD O HYD I SWYDDI GOFALU LLEOL
