Heddiw (Dydd Llun 22 Mehefin) gwnaethom godi baneri Diwrnod y Lluoedd Arfog uwchben Neuadd y Dref i ddangos ein cefnogaeth i’r menywod a’r dynion sy’n ffurfio cymuned ein lluoedd arfog.
Mae wythnos y lluoedd arfog eleni yn cael ei chynnal rhwng dydd Llun 22 a dydd Sul 28 Mehefin.
Dywedodd Maer Wrecsam, y Cynghorydd Jeremy Kent:
“Rydym yn falch o chwifio Baner y Lluoedd Arfog i anrhydeddu a diolch i’n personél y Lluoedd Arfog a’u teuluoedd am yr aberth maen nhw’n ei wneud, ac am eu hymrwymiad, eu hymroddiad a’u gwasanaeth diwyro i’n gwlad.
“Fel rhan o fy nghyfnod yn y swydd fel Maer a gyda chefnogaeth y Cynghorydd Beverley Parry Jones, Hyrwyddwr y Lluoedd Arfog, rydym wedi cyflwyno cynllun Cadetiaid y Maer. Mae’r cynllun hwn yn swydd ddinesig sy’n agored i aelodau o sefydliadau cadetiaid lleol a bydd cadét yn cael ei ddewis i gefnogi’r Maer gydag ymgysylltiadau cyhoeddus wrth wasanaethu fel cennad ieuenctid yn y gymuned.”
Dywedodd y Cynghorydd Beverley Parry Jones, Hyrwyddwr y Lluoedd Arfog yng Nghyngor Wrecsam, “Roedd yn bleser ac yn fraint codi baner y Lluoedd Arfog yn Neuadd y Dref heddiw ochr yn ochr â’r maer a phobl bwysig eraill.
“Mae gennym lawer o gysylltiadau cryf â’r lluoedd arfog yma yn Wrecsam.
“Mae bob amser yn amlwg drwy gynulleidfaoedd mawr mewn digwyddiadau coffa yn y ddinas sy’n cydnabod gwaith ac aberth y lluoedd arfog a’u teuluoedd.”
