Mae Estyn wedi cadarnhau nad yw’r Gwasanaeth Addysg yn Wrecsam bellach yn achos pryder.
Yn ei adroddiad swyddogol, mae’r arolygiaeth addysg yn dweud bod Cyngor Wrecsam – sy’n cefnogi ysgolion ar draws y Fwrdeistref Sirol – wedi gwneud cynnydd digonol ers ei adroddiad arolygu mawr diwethaf yn 2019.
Mae’n manylu ar welliannau sylweddol yn y meysydd canlynol:
- Canlyniadau gwell i ddysgwyr – yn enwedig mewn ysgolion uwchradd.
- Presenoldeb ac ymddygiad gwell.
- Cryfhau cydweithio ar draws timau gwahanol i gefnogi lles disgyblion.
- Gwerthuso a chynllunio’n gwella.
Yn ôl Estyn, ni fydd yr Awdurdod Lleol bellach yn cael ei gategoreiddio ei fod yn ‘achosi pryder sylweddol’.
- Cofrestru -
Mae uwch arweinwyr yng Nghyngor Wrecsam yn dweud bod yr adroddiad cadarnhaol yn adlewyrchu gwaith caled ac ymroddiad staff ar draws y sefydliad ac mewn ysgolion lleol.
Sefyllfa gref
Yn 2019, mynegodd Estyn bryder am ysgolion uwchradd yn y Fwrdeistref Sirol, er ei fod yn cydnabod perfformiad cryf ar lefel ysgolion cynradd.
Ers hynny, mae’r Cyngor wedi bod yn gweithio’n galed i wella safonau a mynd i’r afael â materion.
Dywedodd y Cynghorydd Phil Wynne, Aelod Arweiniol Addysg, “Rydym ni’n ffodus bod gennym ni dîm addysg anhygoel yma yn y Cyngor, ac mae eu gwaith caled ac ymroddiad yn cael ei adlewyrchu yn yr adroddiad cadarnhaol iawn yma gan Estyn.
“Mae hi wedi bod yn siwrnai hir, ond rydym ni wedi gweithio’n galed iawn i ddangos bod addysg yn Wrecsam mewn sefyllfa gref ac y gall plant, pobl ifanc ac oedolion gael yr addysg sydd ei angen arnynt i’w paratoi ar gyfer bywyd llwyddiannus a hapus fel oedolion.
“Diolch yn fawr iawn i bawb sydd wedi gweithio’n galed iawn i sicrhau y gwelliant er gwaethaf yr amgylchiadau anodd a grëwyd gan y pandemig. Fe hoffwn i hefyd ddiolch i Benaethiaid a staff mewn ysgolion ar draws y Fwrdeistref Sirol, ac i wasanaeth gwella ysgolion rhanbarth Gogledd Cymru y GwE, sydd wedi gweithio ar y cyd gyda ni.”
Estyn wedi cydnabod ein gwelliannau
Fe ychwanegodd y Cynghorydd Mark Pritchard, Arweinydd Cyngor Wrecsam, “Pan fynegwyd y pryderon gan Estyn 2019, roeddem yn siomedig, ond wnaethom ni ddim claddu ein pennau yn y tywod.
“Fe wnaethom ymrwymo i fynd i’r afael â hyn yn uniongyrchol, ac fe wnaethom roi adnoddau ychwanegol mewn i addysg, ac mae hyn wedi cael effaith cadarnhaol. Rydym ni’n falch bod Estyn wedi cydnabod ein gwelliannau, ond fyddwn ni ddim yn gorffwys ar ein bri, a byddwn yn parhau i wella wrth i ni symud ymlaen.”
“Fe hoffwn i ddiolch yn fawr i Karen Evans, ein Prif Swyddog Addysg. Ers i Karen ymuno â ni yn 2020, mae hi wedi gwneud gwaith anhygoel, ac mae hi’n cael ei chefnogi gan dîm talentog ac ymroddedig o swyddogion, yn ogystal â Phenaethiaid a staff ysgol ar draws y Fwrdeistref Sirol. Gallwch ddarllen yr adroddiad llawn ar wefan Estyn.
Efallai yr hoffech hefyd ddarllen Sgyrsiau Carbon a Hinsawdd Wrecsam – dweud eich dweud!
Derbyniwch y newyddion a’r wybodaeth ddiweddaraf yn syth i’ch mewnflwch
