Mae Cyngor Bwrdeistref Sirol Wrecsam wedi gosod casgliad newydd trawiadol o westai pryfed ym Mharc Gwledig Tŷ Mawr, a ariennir drwy gyllid grant Lleoedd Lleol ar gyfer Natur Llywodraeth Cymru, i helpu i fynd i’r afael â’r dirywiad sydyn mewn poblogaethau pryfed ledled y DU.
Mae nifer y pryfed wedi gostwng yn sylweddol dros y ddau ddegawd diwethaf, gydag astudiaethau’n dangos bod hyd at 60% o rywogaethau wedi’u colli. Colli cynefin yw un o’r prif ffactorau sydd wedi ysgogi’r dirywiad hwn. Mae Cyngor Bwrdeistref Sirol Wrecsam yn ceisio cynyddu cynefin addas i helpu ein pryfed i ffynnu.
Er bod llawer o bobl yn awyddus i gael gerddi a thirweddau taclus, nid yw hynny’n gynefin addas iawn i bryfed mewn gwirionedd. Maen nhw’n ffynnu mewn “mannau blêr” sy’n eu helpu i gael rhywle i’w alw’n gartref. Mae gwestai pryfed yn cynnig ateb effeithiol a thrawiadol o ran eu golwg, ac yn ffordd wych o helpu pryfed, gan gynnig cartref parod fel bod modd iddyn nhw orffwys, gaeafgysgu a bridio, ac maen nhw’n edrych yn berffaith!
Mae’r gwestai pryfed newydd ym Mharc Gwledig Tŷ Mawr yn rhan o’r llythrennau mawr, trawiadol “Wrecsam”, sydd wedi’u gosod yn erbyn cefndir y draphont eiconig. Yn ogystal â chyflwyno cynefin hanfodol, mae’r gosodwaith wedi’i gynllunio i godi ymwybyddiaeth o ddirywiad pryfed ac annog ymwelwyr i feddwl yn wahanol am fannau sy’n dda i fywyd gwyllt.
Anogir ymwelwyr i alw heibio, mwynhau’r lleoliad, a phrofi’r olygfa unigryw yn enwedig ar ddiwrnod heulog, wrth ddysgu mwy am sut y gall newidiadau bach wneud gwahaniaeth mawr i fyd natur.
Mae Tîm Mannau Agored Cyngor Bwrdeistref Sirol Wrecsam yn defnyddio cyllid Lleoedd Lleol ar gyfer Natur i gyflawni cyfres o brosiectau bioamrywiaeth ar draws parciau’r sir, gan helpu i’w gwneud yn fwy gwydn, addas i fywyd gwyllt a chroesawgar i bobl a byd natur ar yr un pryd.
Pam mae pryfed yn bwysig
Mae pryfed yn chwarae rhan hanfodol mewn iechyd ecosystemau a goroesiad dynol. Maen nhw’n brif beillwyr ar gyfer mwy na 87% o rywogaethau planhigion, yn ailgylchu maetholion yn ôl i’r pridd fel dadelfenwyr, ac yn ffurfio sylfaen gweoedd bwyd sy’n cefnogi adar a mamaliaid. Mae pryfed hefyd yn rheoli plâu yn naturiol ac yn dod â gwerth economaidd sylweddol trwy gynhyrchion fel mêl, sidan a lliwiau naturiol.
Dywedodd yr Aelod Arweiniol ar gyfer yr Amgylchedd, y Cynghorydd David A Bithell: “Mae’r gwesty pryfed trawiadol bellach wedi’i osod ac mae’n lle gwych i dynnu llun wrth ymweld â Pharc Gwledig Tŷ Mawr. “Rhan nesaf y prosiect fydd ychwanegu llwyni a phlanhigion amrywiol o amgylch y gosodwaith yn ogystal â llenwi’r bylchau yn y llythrennau gyda deunyddiau naturiol i sicrhau ei fod yn gynefin diogel a chyfforddus i’n bywyd gwyllt lleol.”
I gael rhagor o wybodaeth am brosiectau Lleoedd Lleol ar gyfer Natur yn Wrecsam, cysylltwch â: LocalPlacesForNature@wrexham.gov.uk
