Arthygl Gwadd Paallam Arts
Bydd 4ydd gŵyl dawns a symudiad awyr agored am ddim y ddinas yn cael ei chynnal ddydd Sadwrn 18fed Gorffennaf
Bydd Wrecsam yn croesawu artistiaid o bob cwr o’r byd i Sgwâr y Frenhines yr haf hwn, wrth i ŵyl gelfyddydol flaenllaw y ddinas, Spirit Fest, ddychwelyd gyda’i rhaglen fwyaf beiddgar eto.
Wedi’i churadu a’i chreu gan y cwmni arobryn Paallam Arts, bydd cyfle i Wrecsam fwynhau cymysgedd arbennig o ddawns, syrcas, theatr ac artistiaid symudiad o Wrecsam ac ardaloedd eraill yng Nghymru, Iwerddon, India a Sbaen yn yr ŵyl awyr agored am ddim a fydd yn dechrau am 10:30am ar ddydd Sadwrn 18fed Gorffennaf.
“Mae Spirit Fest 26 yn addo bod yn ddigwyddiad bywiog, llawn egni a bwrlwm a fydd yn adlewyrchu’r gorau o’n dinas,” meddai Krishnaypriya Ramamoorthy, cynhyrchydd gyda Paallam Arts, “Byddwn yn cynnig cyfle i breswylwyr ac ymwelwyr fel ei gilydd wylio, cyfranogi a mwynhau profiad heb ei ail, un sydd wedi’i greu a’i guradu ar gyfer pobl Wrecsam.”
Uchafbwynt yr ŵyl fydd NoFit State Circus, cwmni syrcas cyfoes graddfa fawr mwyaf blaenllaw y DU, a fydd yn ymweld â Wrecsam am y tro cyntaf yn eu hanes. Bydd Kitsch n Sync Collective hefyd yn chwarae rhan allweddol, gan ddod â’u cyfuniad unigryw o gomedi a theatr stryd i’r sgwâr, ochr yn ochr â gwaith penodol i’r lleoliad sydd wedi’i guradu’n arbennig gan y cwmni syrcas o Iwerddon, Cirkada, wedi’i gefnogi gan Culture Ireland.
Eleni am y tro cyntaf, bydd yr ŵyl hefyd yn cynnwys cynhadledd undydd ar ddydd Gwener 17eg Gorffennaf, a fydd yn cysylltu Cymru â’r byd ac yn cynnig cyfleoedd i drafod sut all y sector gydweithredu a ffurfio partneriaethau rhyngwladol yn well.
Eglurodd Krishnapriya, “Rydyn ni’n angerddol ynghylch datblygu a darparu fframwaith rhyngwladol ar gyfer artistiaid sy’n galluogi cysylltiadau tymor hir ac sy’n rhoi cymaint o fudd i ni yn Wrecsam ag y mae i’n cydweithredwyr.
“Dywedodd un o’n partneriaid hirdymor, Mr Manoj Kumar, Cyfarwyddwr Ayodhana Kalarippayyattu Gurukkul yn ddiweddar, ‘ Pan rydych chi’n tyfu, rydyn ni’n tyfu’, a dyna’n union sut rydym yn gweld elfen gynhadledd ychwanegol eleni. Mae’n gyfle i ddysgu, tyfu a rhannu ochr yn ochr ag artistiaid sy’n gweithio’n lleol, ac yn llawer pellach i ffwrdd.”
Yn y cyfnod yn arwain at yr ŵyl, bydd yna hefyd weithdai addysgol cymorthdaledig ar gyfer ysgolion a phobl ifanc sy’n byw yn y ddinas, wedi’u trefnu a’u cynnal gan Paallam.
“Rydyn ni’n credu’n gryf yn ein galllu i sefydlu a meithrin sgiliau lleol, felly dyna pam mae’r rhaglen estyn allan addysgol mor bwysig ag y mae’r holl ŵyl ei hun,” ychwanegodd Krishnapriya, “I ni, dyma ble rydyn ni’n gallu creu effaith hirdymor sylweddol, a dechrau sgwrs o oedran ifanc iawn.”
Gwybodaeth ar gyfer cyhoeddi
Spirit Fest ‘26 Paallam
Dydd Sadwrn 18fed Gorffennaf, o 10.30am tan 6.30pm
Sgwâr y Frenhines, Wrecsam
Am ddim
Cynhadledd Spirit Fest Paallam,
Dydd Gwener 17eg Gorffennaf
Manylion llawn i’w cyhoeddi
Mwy o wybodaeth ar y wefan
