Erthygl Gwadd
Dros y chwe mis diwethaf mae prosiect uchelgeisiol, Herio Mythau, wedi dod â sefydliadau a chymunedau ar draws Gogledd Cymru ynghyd i herio camsyniadau am ddefnyddio’r Gymraeg yn y gwaith.
Wedi’i gomisiynu gan Is-Grŵp Iaith Bwrdd Gwasanaethau Cyhoeddus rhanbarth y Gogledd, bu’r prosiect yn casglu’r mythau a rhagdybiaethau sy’n bodoli ynghylch gweithio drwy gyfrwng y Gymraeg, boed hynny mewn sefydliadau cyhoeddus neu yn y gymuned ehangach. Yn dilyn casglu profiadau pobl o ddefnyddio Cymraeg yn y gweithle crëwyd adnoddau creadigol a hygyrch sydd yn dangos gwir brofiadau pobl sy’n defnyddio’r Gymraeg yn eu gwaith o ddydd i ddydd.
Yn aml, mae pobl yn teimlo nad yw eu Cymraeg yn “ddigon da” i weithio mewn amgylchedd Cymraeg, i ymgeisio am swydd sydd yn gofyn am y Gymraeg, neu nad oes gwir werth mewn defnyddio’r iaith yn broffesiynol. Drwy gyfres o weithdai, cyfweliadau a grwpiau ffocws, mae Herio Mythau yn rhoi llwyfan i leisiau lleol rannu eu profiadau a herio’r canfyddiadau hynny.
Mae’r prosiect wedi casglu straeon a safbwyntiau gan weithwyr er mwyn creu cynnwys digidol a gweledol sydd yn dangos bod gweithio drwy’r Gymraeg yn bosibl ar bob lefel o ruglder. Bydd y gwaith hefyd yn tynnu sylw at y gefnogaeth sydd ar gael i staff sy’n dysgu neu ddatblygu eu sgiliau Cymraeg yn y gweithle.
Dywedodd Lowri Angharad Hughes, Cadeirydd yr Is-Grŵp Iaith:
“Mae llawer o bobl yn dal yn ansicr am ddefnyddio’r Gymraeg yn y gwaith. Nod Herio Mythau yw dangos bod croeso i sgiliau Cymraeg ar bob lefel ac mai proses yw defnyddio a magu hyder yn yr iaith. Rydyn ni eisiau dathlu profiadau go iawn pobl ledled y rhanbarth.”
Mae’r prosiect yn rhan o ymdrech ehangach i gryfhau defnydd dyddiol o’r Gymraeg yng Ngogledd Cymru, gan adeiladu hyder ymysg siaradwyr a chreu diwylliant cefnogol o fewn gweithleoedd a chymunedau lleol.
Bydd rhagor o wybodaeth, cynnwys digidol a chyfleoedd i gymryd rhan yn cael eu rhannu dros y misoedd nesaf trwy sianeli cyfryngau cymdeithasol y prosiect.
Cynhelir lansiad yr adnoddau ar stondin Grŵp Llandrillo-Menai yn Eisteddfod yr Urdd Môn 2026 ddydd Llun, Mai 25ain am 11y.b, gyda phanel sy’n barod i rannu eu profiadau o weithio drwy’r Gymraeg o fewn y sefydliadau cyhoeddus.
Am fwy o wybodaeth cysylltwch â: BGC-PSB@gwynedd.llyw.cymru
Cyngor Gwynedd; Cyngor Sir Ynys Môn; Cyngor Bwrdeistref Sirol Wrecsam; Cyngor Sir Ddinbych; Prifysgol Bangor; Grŵp Llandrillo-Menai; Gwasanaeth Tân ac Achub Gogledd Cymru; Heddlu Gogledd Cymru; Cyfoeth Naturiol Cymru; Parc Cenedlaethol Eryri, Bwrdd Iechyd Prifysgol Betsi Cadwaladr; Rhaglen ARFOR
Erthygl Gwadd – Is-Grŵp Iaith Bwrdd Gwasanaethau Cyhoeddus rhanbarth y Gogledd
