Mae Cyngor Wrecsam bellach wedi dymchwel hen adeilad Greenacres ar Ffordd Rhosddu i wneud lle i ddatblygu tai cyngor newydd.
Mae’r ailddatblygiad wedi’i gynllunio i ddarparu 58 o gartrefi, a allai fod yn un o brosiectau datblygu tai cyngor mwyaf y Cyngor. Mae’r cynigion yn cynnwys cymysgedd o fathau o eiddo sydd wedi’u cynllunio i ddiwallu’r anghenion tai a nodwyd ar y rhestr aros tai.
Mae’r Cyngor wedi ymrwymo i ddarparu cartrefi fforddiadwy ar gyfer deiliaid contract y dyfodol, gan helpu i ateb y galw lleol a chynyddu argaeledd tai fforddiadwy yn Wrecsam.
Oherwydd ei agosrwydd at ganol y ddinas, ystyrir bod y safle yn addas iawn ar gyfer cynllun tai dan arweiniad y cyngor.
Mae’r prosiect bellach yn symud i’r cam Ymgynghori Cymunedol Cyn Ymgeisio (YCCY). Fel rhan o’r broses hon, mae’r Cyngor wedi paratoi cynigion drafft cychwynnol ac mae’n gwahodd adborth gan y cyhoedd cyn cyflwyno cais cynllunio llawn.
Bydd yr ymgynghoriad, sy’n cael ei gynnal gan Cadnant Planning, yn dechrau ddydd Llun, 18 Mai a bydd ar agor am gyfnod o 28 diwrnod.
Bydd trigolion sy’n lleol i’r safle yn derbyn llythyr cyn bo hir yn eu gwahodd i rannu unrhyw sylwadau neu adborth a allai fod ganddynt ar y datblygiad arfaethedig. Bydd y llythyr yn cynnwys manylion llawn ar sut i gyflwyno ymateb.
Croesewir adborth hefyd gan unrhyw un sydd â diddordeb yn y cynllun. Gellir cyflwyno sylwadau ar-lein yn https://www.cadnantplanning.co.uk/consultations/rhosddu-road neu drwy e-bostio PAC@cadnantplanning.co.uk Mae’r wefan yn darparu rhagor o wybodaeth am y cynigion, a gellir cyfeirio unrhyw gwestiynau ychwanegol at y cyfeiriad e-bost uchod.
Gallwch ddefnyddio unrhyw un o Lyfrgelloedd Wrecsam i weld y wybodaeth hon ar-lein, os nad oes gennych y cyfleusterau gartref.
Mae adborth a gesglir yn ystod yr ymgynghoriad yn rhan bwysig o’r broses a bydd yn cael ei ystyried yn ofalus wrth i’r prosiect symud yn ei flaen. Bydd yr holl sylwadau a dderbynnir yn helpu i lunio’r cynigion terfynol, gan sicrhau bod y datblygiad yn adlewyrchu blaenoriaethau lleol ac yn mynd i’r afael ag unrhyw bryderon a godir gan y gymuned.
Unwaith y bydd y cyfnod ymgynghori wedi dod i ben a’r holl ymatebion wedi’u hadolygu, mae’r Cyngor yn bwriadu paratoi a chyflwyno cais cynllunio llawn ar gyfer y cynllun. Bydd yr adborth a ddarperir yn chwarae rhan allweddol wrth lywio’r cyflwyniad hwn ac arwain camau nesaf y prosiect.
Dywedodd y Cynghorydd David A Bithell, Aelod Arweiniol Tai a Newid Hinsawdd: “Mae hwn yn gynnig pwysig a allai ddarparu tai cyngor o ansawdd uchel, mawr eu hangen yn Wrecsam. Byddai safle Ffordd Rhosddu yn cynnig cyfle i greu tai cynaliadwy, fforddiadwy yn agos at ganol y ddinas.
Rydym nawr yn gofyn i drigolion rannu eu barn a bydd yr holl adborth yn cael ei ystyried cyn i unrhyw gynigion terfynol gael eu dwyn ymlaen.”
