Mae’r gwaith sylweddol i adnewyddu dwy o’r marchnadoedd dan do hanesyddol yn Wrecsam yn dod yn ei flaen yn dda a dylai fod wedi gorffen yn ddiweddarach eleni.
Dechreuodd y gwaith yn yr haf y llynedd wedi i Gyngor Bwrdeistref Sirol Wrecsam benodi SWG Construction o’r Trallwng i arwain y prosiect i ailwampio’r adeiladau’n llwyr.
Mae adeiladau Gradd II y Farchnad Gyffredinol a Marchnad y Cigyddion yn cael eu hailwampio fel rhan o Gynllun Treftadaeth Treflun Wrecsam sydd wedi’i ariannu gan Gronfa Dreftadaeth y Loteri Genedlaethol (diolch i bawb sy’n chwarae’r Loteri), Cronfa Trawsnewid Trefi Llywodraeth Cymru a rhaglen gyfalaf Cyngor Bwrdeistref Sirol Wrecsam.
Meddai Jacqui Gough o SWG Construction: “Mae’r ailwampio’n dod yn ei flaen yn dda – mae’n rhaglen helaeth o waith adnewyddu ac rydyn ni’n ffyddiog y bydd pobl Wrecsam yn falch iawn ohono.
“Mae’r caffi wedi’i orffen ac yn croesawu cwsmeriaid eto, rydyn ni wrthi’n gosod stondinau ym Marchnad y Cigyddion ac mae’r seiri coed, y peirianwyr a’r trydanwyr wrthi’n gosod ar ôl plastro.
Mae gwaith addurno’n dod yn ei flaen ac rydyn ni hefyd wedi cael hwyl ar drwsio’r gwaith cerrig ac wyneb yr adeilad ar y Stryt Fawr. Mae hwn wedi bod yn brosiect difyr, ac fe ddaethon ni o hyd i lawer o nodweddion hanesyddol y gall pobl eu gweld yn y marchnadoedd newydd.”
“Mae’r marchnadoedd yn bwysig iawn o safbwynt adfywio canol y ddinas”
Meddai’r Cynghorydd Nigel Williams, Aelod Arweiniol Economi ac Adfywio: “Mae’n braf clywed bod y gwaith adnewyddu’n dod yn ei flaen yn dda. Mae’r marchnadoedd yn bwysig iawn o safbwynt adfywio canol y ddinas ac mae pawb yn edrych ymlaen at weld y masnachwyr a’r cyhoedd yn dychwelyd yno cyn diwedd y flwyddyn.”
Bu SWG Construction hefyd yn gosod a phlastro nenfydau a waliau stydiau o amgylch stondinau, gosod draeniau a phibellau dan y ddaear a gosod estyll dur a phren addurnol yn y Farchnad Gyffredinol.
Bydd yno drefn newydd ym Marchnad y Cigyddion wedi gosod y stondinau ynghanol y neuadd, gyda’r nod o ddenu mwy o gwsmeriaid a’u hannog i grwydro o gwmpas y farchnad.
Cynigir unedau hyblyg i fasnachwyr a dylai dyluniad canolog y stondinau ei gwneud yn haws i bobl fynd a dod. Ar ôl gorffen y gwaith, bydd gan y ddwy Farchnad well cyfleustodau, rhwydwaith WiFi, Teledu Cylch Cyfyng a gwell mynediad i bobl anabl, a bydd gan y gymuned gyfan farchnadoedd mwy graenus i ymweld â hwy.
Efallai yr hoffech hefyd ddarllen Bydd gwaith yn dechrau ar Heol Offa, Johnstown ddiwedd mis Mehefin
Derbyniwch y newyddion a’r wybodaeth ddiweddaraf yn syth i’ch mewnflwch
