Bydd arddangosfa anhygoel 80 metr o hyd sy’n adrodd hanes yr Ail Ryfel Byd yn dod i Wrecsam yn ddiweddarach y mis hwn!
Mae The Longest Yarn 2 wedi’i greu gan wirfoddolwyr o bob cwr o’r byd, ac mae’n dod â stori Prydain mewn rhyfel yn fyw… pwyth wrth bwyth.
O D-Day a Brwydr Prydain i fywyd bob dydd ar y Ffrynt Cartref, mae pob golygfa wedi’i hymchwilio, ei dylunio a’i gwneud â llaw.
Mae’r arddangosfa ar daith o amgylch y DU ar hyn o bryd, ac mae disgwyl iddi lanio yn Eglwys San Silyn yn Wrecsam ddiwedd y mis hwn, cyn agor i’r cyhoedd ddydd Llun, 5 Hydref.
Mae’n cynnwys 80 o baneli celf wedi’u gwnïo, ac mae’n dilyn ymlaen o’r Longest Yarn 1, a ddaeth i Wrecsam y llynedd hefyd yn darlunio golygfeydd wedi’u gwnïo o D-Day a’r frwydr dros Normandi.
Dywedodd y Cynghorydd Beverley Parry Jones, Hyrwyddwr y Lluoedd Arfog yng Nghyngor Wrecsam: “Byddwn yn annog pawb i wneud amser i weld yr arddangosfa, gan ei fod yn ddarn anhygoel o waith.
“Ymhlith y nifer o arddangosfeydd syfrdanol, dau o’r paneli wedi cael eu crefftio’n gariadus gan ein gwnïwyr a’n croswyr medrus yn Wrecsam, gan ychwanegu cysylltiad lleol arbennig i’r arddangosfa.
“P’un a ydych chi’n hoff o hanes, yn grefftwr brwd, neu’n syml yn chwilio am brofiad diwylliannol ysbrydoledig, peidiwch â cholli’r cyfle hwn – mae’n gyfle i weld rhywbeth arbennig iawn.”
Dywedodd y Parch James Tout, ficer yn Eglwys San Silyn: “Rydyn ni’n gyffrous iawn am yr arddangosfa yn dod i Wrecsam, ac rwy’n gobeithio y bydd cymaint o bobl â phosibl yn gallu ei gweld. Mae’n ddarn unigryw o waith, a gallwch deimlo’r cariad a’r ymroddiad a aeth i mewn i bob golygfa wedi’i gwau … mae’n deimladwy iawn.
“Mae’n arbennig o bwysig i ni yma yn Wrecsam oherwydd y ffaith bod grwpiau gwnïo lleol yn rhan o’r prosiect, ac mae eu sgiliau a’u sylw i fanylion yn anhygoel. Mae’r arddangosfa yn teithio ledled y DU ac mae’n debygol y bydd yn teithio dramor, felly manteisiwch ar y cyfle i’w gweld yn San Silyn.”
The Longest Yarn 2
Eglwys San Silyn, Wrecsam
5 Hydref – 29 Hydref
Dydd Llun i ddydd Sadwrn, 10am – 4pm Bydd mynediad olaf am 3:30pm.
Sylwch y bydd yr arddangosfa ar gau ar ddydd Iau rhwng 11am a 12pm ar gyfer Cymun wythnosol canol wythnos yr eglwys.
Awgrymir rhodd o £5 y pen.
