Mae Tîm Safonau Masnach Cyngor Wrecsam wedi llwyddo i gael rhagor o Orchmynion Cau yn erbyn dau safle manwerthu yn Wrecsam fel rhan o ymdrechion parhaus i fynd i’r afael â gwerthu cynhyrchion tybaco a fêpio anghyfreithlon ac amharu ar weithgaredd troseddol cysylltiedig.
Mae’r Gorchmynion Cau, a roddwyd ddoe gan y Llys Ynadon, yn ymwneud â:
- Simba’s Shop, Stryt y Brenin, Wrecsam
- Brook Street Superstore, Glan yr Afon, Wrecsam
Mae’r weithred yn dilyn cyfres o ymchwiliadau a gweithgareddau gorfodi a gynhaliwyd gan Safonau Masnach Wrecsam, gan weithio’n agos gyda Heddlu Gogledd Cymru ac asiantaethau partner eraill.
Mae Gorchmynion Cau yn fesur gorfodi sylweddol a ddefnyddir i atal gweithgaredd troseddol neu wrthgymdeithasol parhaus sy’n gysylltiedig â safleoedd. Mae’r gorchmynion yn gwahardd mynediad i’r busnesau a’u bwriad yw amddiffyn cymunedau lleol tra bod ymchwiliadau pellach yn parhau.
Mae gwerthu cynhyrchion tybaco a fêpio anghyfreithlon yn aml yn gysylltiedig â throseddu cyfundrefnol ehangach. Mae’r cynhyrchion hyn yn aml yn cael eu gwerthu y tu allan i’r fframwaith rheoleiddio cyfreithiol, gan osgoi trethi a rheolaethau diogelwch, wrth danseilio busnesau dilys sy’n cydymffurfio â’r gyfraith.
Mae Safonau Masnach a Heddlu Gogledd Cymru yn parhau i fod wedi ymrwymo i ddefnyddio’r ystod lawn o bwerau sydd ar gael i amharu ar fasnachu anghyfreithlon, cael gwared ar gynhyrchion anghyfreithlon a diogelu defnyddwyr.
Datganiad gan y Cynghorydd Hugh Jones, Aelod Arweiniol dros Gynllunio Strategol ac Diogelu’r Cyhoedd:
“Mae’r Gorchmynion Cau hyn yn dangos ein penderfyniad i fynd i’r afael â busnesau sy’n masnachu’n anghyfreithlon a’r niwed sylweddol y mae’n ei achosi i’n cymunedau.
“Mae’r fasnach dybaco anghyfreithlon yn aml yn gysylltiedig â rhwydweithiau troseddol ehangach, gan amddifadu’r pwrs cyhoeddus o refeniw mawr ei angen a gwneud cynhyrchion tybaco yn fwy hygyrch i bobl ifanc.
“Hoffwn ddiolch i swyddogion Safonau Masnach a Heddlu Gogledd Cymru am eu hymrwymiad parhaus a’u gwaith mewn partneriaeth i geisio dod â’r materion hyn gerbron y llys.
“Byddwn yn parhau i gymryd camau gorfodi cadarn lle bynnag y nodir tystiolaeth o fasnachu anghyfreithlon.”
Roedd y ceisiadau llwyddiannus yn ganlyniad i weithio’n agos mewn partneriaeth rhwng Gwasanaeth Safonau Masnach Cyngor Wrecsam a Heddlu Gogledd Cymru. Trwy rannu cudd-wybodaeth a chydlynu gweithgaredd gorfodi, mae asiantaethau yn gallu targedu’n effeithiol y rhai sy’n elwa o werthu nwyddau anghyfreithlon a’r gweithgaredd troseddol cysylltiedig.
Mae’r Cyngor yn parhau i fod wedi ymrwymo i gefnogi busnesau lleol cyfreithlon a sicrhau amgylchedd masnachu teg a diogel i drigolion ac ymwelwyr.
Rhoi gwybod am werthiannau anghyfreithlon
Rydym yn annog unrhyw un sydd â gwybodaeth am werthu cynhyrchion tybaco neu fêpio anghyfreithlon i roi gwybod i Safonau Masnach Wrecsam drwy e-bost.
Fel arall, gellir gwneud adroddiadau yn ddienw drwy wefan ymgyrch Dim Esgus. Byth.
