Mae Cyngor Bwrdeistref Sirol Wrecsam, mewn partneriaeth â Bwrdd Iechyd Prifysgol Betsi Cadwaladr (BIPBC), yn buddsoddi mewn Gwasanaeth Presgripsiynu Cymdeithasol a Lles Cymunedol i gefnogi trigolion ledled y fwrdeistref sirol i wella eu hiechyd a’u lles, cynnal eu hannibyniaeth a’u galluogi i gadw mewn cysylltiad â’u cymunedau.
Yn dilyn proses gaffael gystadleuol, dyfarnwyd y contract newydd i The Rainbow Foundation i ddarparu’r gwasanaeth o 1 Medi 2026.
Mae’r gwasanaeth yn cynrychioli cam sylweddol ymlaen mewn cymorth lles cymunedol yn Wrecsam, gan ddod â phresgripsiynu cymdeithasol a chymorth lles cymunedol ynghyd o fewn un model ledled y sir. Mae’r gwasanaeth yn adeiladu ar y cryfderau a’r dysgu o’r rhaglen Asiantiaid Cymunedol lwyddiannus wrth ehangu mynediad, cynyddu integreiddio â gwasanaethau iechyd a gofal cymdeithasol, a darparu cymorth mwy personol i drigolion.
Beth yw presgripsiynu cymdeithasol?
Mae presgripsiynu cymdeithasol yn ddull sy’n canolbwyntio ar yr unigolyn sy’n helpu pobl i wella eu hiechyd a’u lles trwy eu cysylltu â chymorth ymarferol, gweithgareddau cymunedol, grwpiau lleol a gwasanaethau a all wneud gwahaniaeth cadarnhaol i’w bywydau.
Mae’n cydnabod bod llawer mwy na gofal meddygol yn unig yn dylanwadu ar iechyd a lles. Gall ffactorau fel unigrwydd, ynysigrwydd cymdeithasol, cyfrifoldebau gofalu, pwysau ariannol, hyder, symudedd a mynediad at gyfleoedd lleol i gyd effeithio ar ansawdd bywyd person. Mae presgripsiynu cymdeithasol yn cefnogi unigolion i nodi’r hyn sy’n bwysicaf iddyn nhw, a chael gafael ar y cymorth sydd ei angen arnynt i gyflawni eu nodau lles personol.
Mae’r gwasanaeth yn cefnogi pobl 25 oed ac yn hŷn, ac yn annog dull ataliol, gan helpu unigolion i gael gafael ar gymorth yn gynt, cyn i’w hanghenion waethygu.
Bydd y gwasanaeth yn gweithio’n agos gyda phractisau meddygon teulu, gweithwyr iechyd proffesiynol, timau gofal cymdeithasol, mudiadau gwirfoddol, grwpiau cymunedol a phartneriaid lleol i sicrhau bod trigolion yn gallu cael gafael ar gymorth priodol ar yr adeg gywir.
Cefnogi trigolion i fyw’n dda
Dywedodd y Cynghorydd Beverley Parry-Jones, yr Aelod Arweiniol dros Ofal Cymdeithasol i Oedolion: “Rydym yn cydnabod y cyfraniad hynod bwysig y mae Asiantiaid Cymunedol wedi’i wneud i gefnogi ein cymunedau dros nifer o flynyddoedd. Gan weithio mewn partneriaeth â BIPBC, mae’r gwasanaeth Presgripsiynu Cymdeithasol newydd yn adeiladu ar y gwaith gwych hwnnw, ac yn creu dull mwy cydgysylltiedig a chynaliadwy a fydd o fudd i drigolion ledled Wrecsam.
“Trwy alinio â pholisi cenedlaethol a gweithio’n agos gyda’n partneriaid iechyd, rydym yn sicrhau y gall pobl barhau i dderbyn cymorth cymunedol o ansawdd uchel sy’n eu helpu i aros yn iach, yn gysylltiedig ac yn annibynnol.”
Dywedodd Caroline Tudor-James, Prif Weithredwr The Rainbow Foundation: “Rydym wrth ein bodd bod Cyngor Bwrdeistref Sirol Wrecsam a Bwrdd Iechyd Prifysgol Betsi Cadwaladr wedi dewis buddsoddi mewn ehangu presgripsiynu cymdeithasol ar draws Wrecsam.
“Mae hyn yn adeiladu ar wasanaeth sefydledig ac arobryn sydd wedi cefnogi pobl leol ers blynyddoedd lawer. Trwy’r bartneriaeth uwch hon, bydd mwy o drigolion yn gallu cael gafael ar gymorth personol sy’n canolbwyntio ar eu cryfderau, eu dyheadau a’r hyn sy’n bwysicaf iddynt.
“Mae The Rainbow Foundation yn cael ei chydnabod fel Canolfan Ragoriaeth ar gyfer Heneiddio’n Dda yng Nghymru, gan ddarparu adsefydlu, therapi, gofal a chymorth, gwybodaeth, cyngor a gweithgareddau sy’n grymuso annibyniaeth, gwella lles a chyfoethogi bywydau.
“Un o’r pethau rydyn ni’n fwyaf angerddol yn eu cylch yw sicrhau bod trigolion yn gallu cael gafael ar gymorth yn hawdd. Rydym yn annog pobl i gysylltu â ni’n uniongyrchol os ydynt yn teimlo y byddent yn elwa o gymorth ychwanegol. Nid oes angen i chi aros am atgyfeiriad gan eich meddyg teulu neu weithiwr proffesiynol arall. Weithiau, gall sgwrs syml fod y cam cyntaf tuag at wella lles, magu hyder ac ailgysylltu â’ch cymuned.
“Trwy weithio ochr yn ochr â phartneriaid iechyd, gofal cymdeithasol a chymunedol, gallwn helpu mwy o bobl i gael gafael ar gymorth yn gynt, cryfhau cysylltiadau o fewn eu cymunedau a gwella eu lles cyffredinol.”
Sut mae cael mynediad at y gwasanaeth
Mae’r Gwasanaeth Presgripsiynu Cymdeithasol a Lles Cymunedol yn croesawu atgyfeiriadau gan:
- Unigolion sy’n ceisio cymorth iddyn nhw eu hunain
- Aelodau o’r teulu a gofalwyr (gyda chaniatâd)
- Practisau meddygon teulu
- Gweithwyr iechyd proffesiynol
- Gweithwyr gofal cymdeithasol proffesiynol
- Sefydliadau cymunedol a gwirfoddol
- Cynghorwyr a gwasanaethau rheng flaen eraill
Anogir hunanatgyfeiriadau, ac nid oes angen i drigolion gael eu hatgyfeirio gan weithiwr iechyd proffesiynol i gael gafael ar gymorth.
Am ragor o wybodaeth neu i wneud atgyfeiriad:
E-bostiwch: spt@rainbowfndn.org.uk
Ffoniwch: 01948 830730
Maer yn rhoi gwaed i gefnogi ymgyrch rhoi – Newyddion Cyngor Wrecsam
