Gall sglefrfyrddwyr, reidwyr sgwteri a sglefrwyr mewnlin nawr fwynhau parc sglefrio newydd sbon yn Lôn Price yn Rhosddu.
Agorwyd y cyfleuster gwerth £100,000 yn swyddogol mewn digwyddiad lansio a fynychwyd gan y Cynghorydd I. David Bithell MBE, cynrychiolwyr o Gyngor Cymuned Rhosddu, Sgowtiaid a Geidiaid lleol Wrecsam, a swyddogion o Gyngor Bwrdeistref Sirol Wrecsam.
Mae’r prosiect wedi newid yr hen barc sglefrio dur am gyfleuster concrit modern sydd wedi’i gynllunio i fod yn fwy hygyrch, gwydn ac addas i ddefnyddwyr o wahanol oedrannau a galluoedd.
Ymgynghorwyd â phlant a phobl ifanc leol ar ddatblygiad y prosiect a chawsant eu gwahodd i rannu eu barn ar y nodweddion yr oeddent am eu gweld, a helpodd eu hadborth i lunio’r dyluniad terfynol.
Cafodd y gwaith ailddatblygu ei ariannu gan Gyngor Cymuned Rhosddu a’i hyrwyddo gan y Cynghorydd I. David Bithell MBE, a weithiodd yn agos gyda phartneriaid i symud y prosiect yn ei flaen. Penodwyd y contractwr Wheelscape, sy’n arbenigo mewn parciau sglefrio, yn dilyn proses gaffael gystadleuol.
Dywedodd y Cynghorydd I. David Bithell MBE, Cynghorydd Sir dros Ward Stansty, Rhosddu:
“Rwy wrth fy modd bod Parc Sglefrio newydd Lôn Price bellach ar agor yn swyddogol ac yn cael ei fwynhau gan drigolion lleol.
Roedd yr hen barc sglefrio wedi cyrraedd diwedd ei oes ddefnyddiol ac roedd angen ei uwchraddio i ddiwallu anghenion defnyddwyr yn well. Cynhaliwyd arolwg gyda defnyddwyr presennol i gael gwybod pa nodweddion yr oeddent am eu gweld yn y parc sglefrio newydd, ac mae eu hawgrymiadau wedi’u hymgorffori yn y dyluniad terfynol.
Roeddwn i’n falch o sicrhau cyllid gan Gyngor Cymuned Rhosddu ar gyfer y prosiect hwn, ac rwy’n ddiolchgar iawn amdano. Hoffwn hefyd ddiolch i Swyddogion Amgylchedd Cyngor Bwrdeistref Sirol Wrecsam am eu cefnogaeth drwy gydol y prosiect.
Mae’n wych gweld pobl ifanc bellach yn elwa o gyfleuster modern o ansawdd uchel a fydd yn gwasanaethu’r gymuned am flynyddoedd lawer i ddod.”
Mae disgwyl i’r cyfleuster newydd ddod yn gyrchfan boblogaidd i selogion chwaraeon olwynion ledled yr ardal, gan ddarparu gofod diogel, cynhwysol a deniadol ar gyfer hamddena, gweithgarwch corfforol ac ymgysylltiad cymunedol.
