Ar 20 Gorffennaf 2023 daeth sancsiynau newydd i rym sy’n golygu y gall busnesau ac unigolion sy’n gwerthu tybaco anghyfreithlon gael dirwy o hyd at £10,000.
Bydd gan swyddogion Safonau Masnach y pŵer i atgyfeirio achosion at gyllid a Thollau Ei Fawrhydi er mwyn iddynt ymchwilio ymhellach i fusnesau neu unigolion sydd wedi’u dal yn gwerthu tybaco anghyfreithlon. Bydd CThEF, ble bo’n briodol, yn gweinyddu’r cosbau ac yn sicrhau bod sancsiynau priodol yn cael eu rhoi a’u gorfodi. Yn dibynnu ar ddifrifoldeb yr achosion, gall busnesau sy’n torri’r rheolau:
- Wynebu cosb rhwng £2,500 a £10,000 am gyflenwi cynnyrch sy’n mynd yn groes i ofynion Tracio ac Olrhain Tybaco
- Gweld eu cynnyrch yn cael ei atafaelu
- Colli eu trwyddedau yn y DU drwy ddiddymu eu ID Gweithredwr Economaidd
Mae’r pwerau newydd yn adeiladu ar waith llwyddiannus Operation CeCe, menter ar y cyd rhwng CThEF a’r Safonau Masnach Cenedlaethol i fynd i’r afael â’r fasnach dybaco anghyfreithlon, sydd wedi gweld 27 miliwn o sigaréts anghyfreithlon a 7,500kg o dybaco rolio â llaw yn cael eu hatafaelu – a hynny mewn dwy flynedd yn unig.
I’r trysorlys, mae masnachu cynnyrch o’r fath yn costio dros £2 biliwn mewn refeniw trethi. Mae hefyd yn difrodi busnesau cyfreithlon, yn tanseilio iechyd y cyhoedd ac yn hwyluso cyflenwi tybaco i bobl ifanc.
- Cofrestru -
Gallwch ddarllen canllawiau’r sancsiynau newydd yma.
I wybod mwy am dybaco anghyfreithlon neu i roi gwybod am werthiant anghyfreithlon yn eich ardal chi, ewch i https://noifs-nobutts.co.uk/ neu ffoniwch 029 2049 0621.
Mae tybaco yn aml iawn yn cyrraedd dwylo plant
Meddai Roger Mapleson, Arweinydd Safonau Masnach a Thrwyddedu Wrecsam: “Ar gyfartaledd mae tybaco anghyfreithlon yn costio tua hanner pris tybaco cyfreithlon, ac mae ar gael yn ein cymunedau ni. Mae pris isel a’r argaeledd y cynnyrch yn ei wneud yn haws i blant ddechrau ysmygu a dechrau dibynnu arno, ac mae’n gwneud pethau’n anoddach i ysmygwyr sy’n ceisio rhoi’r gorau iddi.
“Os ydych chi’n gwybod am fusnes neu unigolyn sy’n gwerthu tybaco anghyfreithlon yn eich ardal chi, rhowch wybod am hynny drwy ffonio’r rhif uchod.”
Dywedodd Kate Pike, Prif Swyddog y Sefydliad Safonau Masnach Siartredig, “Mae Swyddogion Safonau Masnach ledled y wlad yn gweithio gyda chydweithwyr ym maes Iechyd y Cyhoedd i leihau’r niwed o ysmygu a chyda phartneriaid gorfodi i darfu ar droseddau yn ein cymunedau.
“Rydym yn croesawu’r ychwanegiad hwn i’n pecyn cymorth o fesurau i fynd i’r afael â thybaco anghyfreithlon, gan sicrhau bod y rhai sy’n ceisio elwa o gyflenwi’r cynhyrchion hyn yn wynebu cosbau sylweddol am wneud hynny, ac mae eu gallu i barhau i fasnachu yn cael ei effeithio’n ddifrifol.”
Efallai yr hoffech chi hefyd ddarllen ‘Gnocwyr Nottingham’ yn ardaloedd Wrecsam a Sir y Fflint
Derbyniwch y newyddion diweddaraf ar sgamiau, galw nôl cynnyrch a materion diogelu’r cyhoedd eraill
