Fe fydd cynllun Llywodraeth Cymru i gyflwyno terfyn cyflymder 20mya yn ddiofyn yng Nghymru yn dod yn fyw ddydd Sul, gan olygu mai Cymru fydd y wlad gyntaf yn y DU i gyflwyno terfyn cyflymder 20mya cenedlaethol ar y rhan fwyaf o ffyrdd preswyl.
Mae Cyngor Wrecsam wedi bod yn paratoi ar ffyrdd Wrecsam i sicrhau fod popeth yn eglur pan fyddwch yn gyrru yn y fwrdeistref sirol.
Ddechrau’r wythnos hon roedd gwaith wedi ei wneud ar 95% o’r arwyddion ac mae’n bosibl eich bod wedi sylwi fod y marciau 30mya ar y ffyrdd wedi eu tynnu neu y paentiwyd drostynt wrth i’r dyddiad lansio y penwythnos hwn nesáu.
O ddydd Sul Medi 17 ymlaen bydd y terfyn cyflymder newydd hwn fwyaf perthnasol i strydoedd preswyl neu strydoedd prysur gyda cherddwyr, felly pan welwch chi olau stryd fe ddylech dybio mai 20mya yw’r terfyn cyflymder, oni bai fod yna arwyddion yn nodi fel arall.
Dywedodd Hugh Jones, Aelod Arweiniol yr Amgylchedd: “Mae timau o adran yr amgylchedd Cyngor Wrecsam wedi bod allan yn newid yr arwyddion ers dros dri mis yn barod ar gyfer Medi 17 ac rydym ni bron yna rŵan. Mae’r ymgynghoriadau ar unrhyw eithriadau a oedd yn bodloni meini prawf Llywodraeth Cymru hefyd wedi eu cwblhau ac fe hoffwn ddiolch i’r holl breswylwyr hynny a dreuliodd amser yn rhoi eu safbwyntiau i ni.”
Mae mwy o wybodaeth ar dudalen Cwestiynau Cyffredin Llywodraeth Cymru a thudalen we cyfyngiadau cyflymder 20mya yng Nghymru Cyngor Wrecsam.
Derbyniwch y newyddion a’r wybodaeth ddiweddaraf yn syth i’ch mewnflwch.
