Mae Ysgol Clywedog wedi cael ei thynnu oddi ar y rhestr mesurau arbennig yn dilyn arolygiad diweddar gan Estyn.
Mae’r adroddiad yn cydnabod y gwelliannau sylweddol sydd wedi’u gwneud yn yr ysgol dros y ddwy flynedd ddiwethaf, ac mae’n tynnu sylw at effaith gadarnhaol arweinwyr, athrawon a llywodraethwyr ar ddiwylliant, addysgu a dysgu’r ysgol.
Nododd arolygwyr fod y disgyblion yn ymddwyn yn aeddfed ac yn synhwyrol yn yr ysgol, yn cyrraedd gwersi yn brydlon ac yn mynd ati’n ddi-oed i weithio. Fe wnaethon nhw hefyd dynnu sylw at agwedd gadarnhaol disgyblion at ddysgu, eu hymddygiad parchus tuag at eraill a’u parodrwydd i gymryd rhan mewn trafodaethau dosbarth.
Dywedodd y Cynghorydd Phil Wynn, yr Aelod Arweiniol dros Addysg, “Mae hyn yn newyddion gwych i gymuned Ysgol Clywedog. Mae tynnu’r ysgol o’r rhestr mesurau arbennig yn rhywbeth i’w groesawu’n fawr, ac mae’n adlewyrchu ymroddiad y pennaeth, staff, llywodraethwyr, disgyblion, a theuluoedd.”
“Er bod hyn yn amlwg wedi bod yn ymdrech tîm, rwy’n credu y dylid cydnabod effaith newidiadau diweddar o ran arweiniad yr ysgol, ac mae’r adroddiad yn canmol arweinyddiaeth y Pennaeth, Simon Ellis, a ddechreuodd yn ei swydd ym mis Medi 2024 ar ôl 13 mlynedd fel Pennaeth Ysgol Maelor.”
Dywedodd Simon Ellis “Rwy’n falch iawn bod y gwelliannau rydyn ni wedi’u gwneud dros y ddwy flynedd ddiwethaf wedi cael eu cydnabod. Mae gweld eu gwaith caled yn cael ei gydnabod yn hwb mawr i bawb yn yr ysgol. Ond un garreg filltir yw hon ar ein taith i wella, mae yna lawer o bethau cadarnhaol wedi digwydd ond mae llwybr clir ar gyfer meysydd sydd angen eu gwella o hyd, ac fe gallwn ni nawr ganolbwyntio ar wneud ysgol dda yn un wych.”
Roedd yr adroddiad hefyd yn dweud bod gan athrawon ddisgwyliadau uchel priodol, a’u bod yn cynnig cyfleoedd pwrpasol i ddisgyblion ddatblygu eu geirfa pwnc-benodol. Disgrifiwyd llywodraethwyr fel cefnogwyr cryf i’r ysgol, gyda dealltwriaeth gadarn o’i chryfderau a’i meysydd i’w datblygu.
